د کار او ټولنیزو چارو وزارت د بېروزګارۍ کمولو او افغانانو ته د کاري فرصتونو برابرولو په موخه، قطر ته د کارګرو استولو هوکړې پر مسودې موافقه کړې.
دغه مسوده د ياد وزارت چارواکو او د قطر يوه مختلط دولتي شرکت ترمنځ شوې چې پر بنسټ به يې ۷۰۰ افغان کارګران قطر ته د کارکولو لپاره ولېږدول شي.
د مسودې په هوکړه کې په قانوني او خوندي توګه بهر ته د افغان کارګرانو لېږل او په راتلونکي کې يې د حقونو لازم ملاتړ د عمده اهدافو په توګه درج شوي دي.
د کار او ټولنيزو چارو وزارت ویاند سمع الله ابراهیمي وايي: « د کار او ټولنیزو چارو وزارت د دوامداره هڅو په پایله کې په لومړي ځل د قطر شاهي هېواد له یوه مختلط دولتي شرکت او د افغانستان د کار موندنې خصوصي شرکتونو ترمنځ د افغان کارګرانو د لېږد په تړاو هوکړه وشوه. د دې هوکړې له مخې اوسمهال افغان کارګرانو لپاره ۷۰۰ کاري فرصتونه ځانګړي شوي دي.»
د دې وزارت د مسوولینو په خبره، هڅې روانې دي چې د وړاندیز شوې مسودې له وروستي تایید وروسته، دغه هوکړه د دواړو هېوادونو ترمنځ په رسمي توګه لاسلیک شي.
دوی زياتوي، د نوم لیکنې او ثبت پروسه به د یاد وزارت اړوند له هېواده بهر د کارګرو لېږلو ریاست تر نظارت لاندې او د کارموندنې د يوه خصوصي شرکت له لوري په قانوني او باوري ډول پیل شي.
په ورته مهال، د اقتصادي چارو شنونکي د یاد وزارت دغه کړنه ستايي او وايي، سرپرست حکومت دې د کاري فرصتونو د رامنځته کولو په موخه د قطر په شمول نورو هېوادونو کې هم افغان کارګرانو ته ورته کاري فرصتونه رامنځته کړي، ترڅو د بېروزګارۍ کچه راټيټه شي.
د اقتصادي چارو شنونکی نورالله عزیز وايي: « که افغانانو ته داسې فرصتونه برابر شي چې هغوی وکولی شي په رسمي او قانوني ډول نورو هېوادونو ته د کار لپاره لاړ شي او هلته په مختلفو برخو کې ورته د کار زمینه برابره شي، دا د افغانستان پر اقتصاد باندې اغېز لرلی شي.»
خو یو شمېر نو بیا په دې باور دي چې سرپرست حکومت دې افغان کارګرانو ته د نورو هېوادونو پر ځای په کوردننه کاري فرصتونه رامنځته کړي او له مسلکي کسانو دې په کور دننه په عامه او خصوصي سکټور کې استفاده وکړي.
د اقتصادي چارو شنونکی محمد یونس ځدراڼ وايي: « زما په نظر، که د افغانستان په داخل کې خلکو ته د کار زمینه برابره شي، ځکه زموږ ډېری خلک بېکاره دي او داسې نورو هېوادونو ته د خلکو لېږل چې هلته کار وکړي، دا بسنه نه کوي؛ ځکه چې مشخص شوی شمېر هم د افغانستان د خلکو لپاره کافي نه دی.»
دا په داسي حال کي ده چې په افغانستان کې د بې روزګارۍ کچه ورځ تر بلې زیاتېږی او له امله يې د خلکو شکایتونه هم په زياتېدو دي.
