د غزې روغتیایي چارواکو ویلي، اسراییلي ځواکونو په غزه کې د ملګرو ملتونو مرستو ته پر راټولو شویو فلسطینیانو ډزې کړې او ۶۷ کسان يې شهیدان کړې دي.
د راپورونو له مخې، دا په روانه اوونۍ کې په عامو فلسطينيانو د اسرایيلو درېيم خونړی بريد دی.
دې بريدونو ته د اسلامي امارت حکومت غبرګون ښودلی او د يوې اعلاميې په خپرولو سره يې په غزې کې د اسراییلو ظلم، د لوږې فشار او محاصره، د ملکيانو وژل او د مرستو د وېش پرمهال د مېرمنو او ماشومانو بمبارول غندلي دي.
د اسلامي امارت مرستیال ویاند حمدالله فطرت وايي:« موږ په مسلمانو هېوادونو او نورو مؤثرو جهتونو غږ کوو چې هرڅومره ژر د غزې مظلومو مسلمانانو او ښځو ته د بشري مرستو رسېدو لپاره لاره برابره کړي او هلته روان ظلم او زیاتی پای ته ورسوي.»
د ملګرو ملتونو د خوړو نړیوال پروګرام هم د اسراییلي ځواکونو له خوا دا بريدونه د نه منلو وړ ګڼي او له نړیوالې ټولنې يې غوښتي چې د غزې روان وضعیت ته رسېدنه وکړي.
له دې سره سم، د سیاسي چارو کارپوهان په غزې کې روان جنګي جنایت د اندېښنې وړ بولي او له نړیوالو غواړي چې د غزې روان وضعیت ته جدي پاملرنه وکړي.
د سیاسي چارو کارپوه ادریس محمدي ځاځی وايي: « له نړیوالو بنیادونو، سازمانونو، بین المللي هغه حکومتونه چې د بشر دوستۍ غږ اوچتوي او همدغه عنوان لاندې کارونه ترسره کوي، له هغوی مو جدي غوښتنه ده چې د فلسطین د غزې خلکو غږ واوري.»
ځینې نور بیا له زبرځواکو هېوادونو غواړي چې د اسراییلو ورته بریدونو مخنیوي او د فلسطین قضیې ته د یوې داسې دایمي حل لارې د را ایستلو لپاره عملي اقدام وکړي چې له مخې یې په غزه کې د ملکي مرګ ژوبلې مخنیوي وشي.
د سیاسي چارو شنونکی محمد سلیم پیګیر وايي: « هغه نړیوال سازمانونه چې چغې وهي، فریادونه کوي، د بشري حقونو خبرې کوي، خو د غزې د خلکو په اړه د خپلو بادارانو په امر غلي پاتې شوي دي. دا د نړۍ د ټولو مسلمانانو دنده ده چې د غزې د خلکو ملاتړ ته ورشي.»
د سیاسي چارو شنونکی توریالی ځاځی وايي: « خصوصا ً دا عربي هېوادونه چې په غزې کې څومره ناروا بشري جنایتونه هم امریکا د اسراییلو صهیونستي رژیم ترسره کوي، خو دوی پټه خوله ناستي.»
د غزې روغتیایي چارواکو د مالوماتو له مخې، د اسراییلو او حماس ترمنځ د جګړې له پیله څه باندې ۵۸ زره عام فلسطینیان شهیدان شوي او له ۱۳۵ زرو ډېر ژوبل شوي دي.
