د بهرنیو چارو وزارت سرپرست مولوي امیرخان متقي د روسیې له لوري د سرپرست حکومت رسمیت پېژندنه، په نړیوالو او سیمه ییز ناستو کې د لوړپوړو حکومتي چارواکو ګډون او له شاوخوا ۴۰ هېوادونو سره د ډېپلوماټیکو اړیکو لرل، په سیاسي برخه کې لویه لاسته راوړنه او د روښانه راتلونکي لپاره ښه زیری ګڼي.
متقي د بهرنیو چارو وزارت د ډېپلوماسۍ انسټیټيوټ په فراغت غونډه کې د خبرو پرمهال ويلي، له روسیې او د سیمې له نورو هېوادونو سره د مثبتو اړیکو لرل هېڅکله له نورو هېوادونو سره د تضاد او تقابل په مانا نه دي.
نوموړی وايي، د امریکا په ګډون د لوېدیځ، سیمې او نړۍ له هېوادونو سره مثبتې او نږدې اړیکې غواړي او بالعکس د تعامل او د روسیې په څېر د رسمیت پېژندنې تمه لري.
متقي په دې اړه وايي: « دا چې موږ د سیمې له هېوادونو سره ښې اړیکې او ښه پرمختګ لرو، د دې مانا دا نه ده چې موږ له لرې هېوادونو سره ښې اړیکې نه لرو. زموږ سیاست متوازن سیاست دی او له ټولو هېوادونو سره مثبتې اړیکې غواړو. هغه هېوادونه چې تر اوسه پورې نه دي را وړاندې شوي، غربي هېوادونه او د امریکا متحده ایالتونو سره هم مثبت تعامل، ډېپلوماټیکې او اقتصادي اړیکې غواړو. له یوه جهت سره زموږ پرمختګ د بل جهت پر ضد نه دی، دا زموږ پالیسي ده.»
نوموړی وايي، د طرحه شوې اقتصاد محوره پالیسۍ له مخې یې هڅه دا ده چې افغانستان له دې وروسته د تقابل د مرکز پر ځای د تعامل او د ګډو ګټو پر مرکز بدل شي.
متقي د امریکا ولسمشر ډونالډ ټرمپ له لوري د هغې ادعا په تړاو چې وايي، بګرام هوايي اډه چین اشغال کړې، نړۍ ته ډاډ ورکوي چې افغانانو د تاریخ په اوږدو کې په خپل هېواد کې هېڅ بهرني حضور ته اجازه نه ده ورکړې.
هغه د جرمونو نړیوالې محکمې له لوري د اسلامي امارت د رهبر او د سترې محکمې د مشر نیولو امر ناعادلانه او له ټولو اصولو سره په ټکر کې وباله.
د بهرنیو چارو وزارت سرپرست امیرخان متقي وايي: « د افغانستان اسلامي امارت او ټول ولس د افغانستان په یوه اېنچ ځمکه باندې هم بهرنی نظامي حضور نه مني. دا خبره دې جمهورییس ټرمپ هم د زړه په غوږونو واوري، نور هېوادونه یې دې هم واوري چې موږ تعامل کوو، خو سیاسي، ډېپلوماټیک او اقتصادي تعامل کوو او په افغانستان کې د چا د نظامي حضور په اړه اصلا ً خبره هم نه کوو.»
د سیاسي چارو شنونکي هم له نړۍ سره د متوازنو اړیکو پر لرلو د ټینګار ترڅنګ په دې برخه کې د بېلانس ایجادول د افغانستان پر ګټه بولي.
د دوی نظر دا دی چې سرپرست حکومت باید هڅه وکړي افغانستان د نورو هېوادونو د ګټو د تقابل پر ځای د سیاسي، اقتصادي او تجارتي همکاريو پر مرکز بدل کړي.
د سیاسي چارو شنونکی خلیل احمد نادم وايي: « دا خو ډېره ښه خبره ده چې افغانستان له ټولې نړۍ سره متوازنې اړیکې ولري، خو دا چې اوس روسیې په رسمیت پېژندلی، روسیه په ۱۹۲۱ هم لومړنی هېواد و چې د افغانستان خپلواکي یې پر رسمیت وپېژندله. خبره دا ده چې امریکا دلته افغانستان کې میلیاردونه ډالر مصرف کړي، یو سیسټم یې جوړ کړی او دا سیسټم ټول پر خپل ځای دی؛ کله چې طالبان قدرت ته راغلل، هېڅ شی کمبود نه و. نو زه فکر نه کوم امریکا له خپلو ګټو تېره شي؛ که چېرې تقابل نه وي، نو ښه ده چې امریکا سره ښه تعامل ولرو.»
اسلامي امارت داسې مهال بیا ځل پر نړۍ د تعامل او مثبتو اړیکو غږ کوي چې په تېرو نږدې څلورو کالو کې یې بار بار د رسمیت پېژندنې غوښتنه کړې.
هغه غوښتنه چې له روسیې پرته تر دې دمه هېڅ هېواد ورته مثبت ځواب نه دی ورکړی.
