د هلمند ولایت د باباجي ولسوالۍ اوسېدونکي د یادې ولسوالۍ د مرکزي روغتون د پراختیا ترڅنګ، په دې ولسوالۍ کې د لا ډېرو روغتیایي مرکزونو، درملو او طبي توکو د زیاتېدو غوښتنه کوي.
دوی وایي، د دې ولسوالۍ نفوس زیات دی او پر مرکزي کلینیک د ناروغانو ګنه ګوڼه زیاته ده، نو ځکه ورته بسنه نه کوي او په خبره یې باید پراخ او طبي امکانات یې لا زیات شي.
د باباجي ولسوالۍ یو تن اوسېدونکی محمد ظاهر وايي: « موږ خپل ناروغان له دې ځایه لښکرګاه ته وړو، نه مو حکومت غږ اوري او نه مو وطن کې داسې څوک شته چې دا ستونزه را هواره کړي. موږ غوښتنه کوو چې دلته روغتیايي مرکز جوړ شي.»
د باباجي ولسوالۍ یو بل اوسېدونکی محمد شفېع وايي: « دلته یو کلینیک شته، خو خلک ډېر دي بسنه نه کوي. دلته باید بل کلینیک هم جوړ شي، ترڅو خلک هوسا شي. زموږ خلک په پور شخصي معاینه خانو ته ورځي.»
د باباجي ولسوالۍ اوسېدونکی قاري عبدالله وايي: « موږ په دې سیمه کې روغتون او کلینیک ته سل په سلو کې ضرورت لرو. کله چې عاجل ناروغ پیدا شي، هېڅ ځای ته مو لاسرسی نه کېږي.»
په ورته مهال، د یادې ولسوالۍ سیمه ییز مسوولین وایي، د روغتون د پراختیا او نورو روغتیايي مرکزونو جوړېدو په موخه یې اړوندو ادارو ته خپلې غوښتنې استولې دي او هیله مندي ښيي چې دا غوښتنې به یې ژرعملي شي.
د باباجي ولسوالۍ مرستیال عبدالقیوم حسني وايي: « موږ خپل غږ د عامې روغتیا ریاست او وزارت ته رسولی دی، خو لاهم ستونزې شته دي. باباجي ولسوالي یوه ګڼ مېشته سیمه ده، موږ کوشش کوو چې د ولایت مقام په همکارۍ دا ستونزه حل کړو.»
د هلمند باباجي ولسوالۍ لښکرګاه ښارته نژدې، شمال لوېدیځ کې پرته ولسوالي ده چې لسګونه کلي او پراخ نفوس لري.
دا سیمه د اوږدو جګړو له امله ډېره ځپل شوې او تر دې دمه ورته د بیا رغونې په برخه کې کمه پاملرنه شوې ده.
