د لغمان ولایت په قرغیو ولسوالۍ کې مېشت کوچي قومونه شکایت کوي چې روغتیایي اسانتیاوو ته یې لاسرسی محدود شوی.
دوی وايي، پخوا به ګرځنده روغتیايي کلینیکونه د دوی سیمې ته ورتلل او د بېلابېلو ناروغیو درملنه به یې کوله، خو په دې وروستیو کې دا خدمات درېدلي او له امله یې دوی د ملاریا او محرقې په ګډون په ګڼو نورو ساري او ویروسي ناروغیو اخته شوي دي.
د کوچي قوم یو تن مشر شمس الحق وايي: « دلته پخوا یوه موسسه وه چې د کوچیانو لپاره یې ډېر خدمت کاوه، دوی به هر ځای په کوچیانو پسې ګرځېدل او د مېندواره ښځو خدمت به یې کاوه او ماشومانو ته به یې واکسینونه ورکول. کوچینان د دښتو غریب خلک دي او روغتیايي خدمتونو ته ډېر ضرورت لري.»
یو تن بل کوچی مشر عبد الحی وايي: « زموږ خلک د صحت په برخه کې له ډېرو کړاوونو سره مخ دي. زموږ کوچییانو لومړنۍ غوښتنه دا ده چې د روغتیا وزارت زموږ د ستونزو هوارولو لپاره لازمه همکاري وکړي.»
دوی د دې ولایت له مسوولینو غوښتنه کوي چې د ستونزې حل لپاره لاس په کار شي او سیمې ته دې مجهز روغتیايي ټیمونه واستوي.
د کوچي قوم یو تن مشر احمد وايي: « موږ غوښتنه کوو چې د ماشومانو لپاره جالۍ راکړې، د ملاریا او محرقې ناروغیو درملنه وکړي او مخه یې ونیسي.»
د کوچیانو یو بل مشر ملک شینواری وايي: « پخوا به په دې برخه کې دواګانې وې، خو اوس زموږ دواګانې او نور شیان کم شوي یا هېڅ نه شته. غواړم دولت زموږ غږ واوري او پاملرنه وکړي.»
د لغمان ولایتي چارواکي هم دا ستونزې مني، خو د حل برخه کې یې د اقداماتو خبره کوي. د مسوولینو په خبره، اوس مهال د لغمان په ډېری سیمو کې د ګرځنده روغتیايي ټیمونو خدمات درېدلي، خو له عامې ورغتیا وزارت سره یې د دې ټیمونو د بیا فعالېدو په تړاو خبرې کړې او هغوی هم د ستونزې د حل ډاډ ورکړی.
د لغمان والي ویاند عبد المالک نیازی وايي: « د روغتیا په بېلابېلو برخو کې چې کوم سیار ټیمونه وو او ولسونو ته یې خدمات وړاندې کول. په راتلونکي کې پلان لرو هغو ساحو کې چې کوچي ولسونه ژوند کوي او له کلینکونو لرې دي، خدمات وړاندې کړو. رییس صاحب د همدې لپاره مرکز ته تللی، ترڅو سیار ټیمونه بېرته فعال کړي او د دوی ستونزې هوارې شي.»
د روغتیا نړیوال سازمان د راپور له مخې، د افغانستان د عامې روغتیا وزارت په همکارۍ د کوچیانو او لرې پرتو سیمو خلکو ته د لومړنیو روغتیايي خدمتونو وړاندې کولو لپاره، په ۱۲ ولایتونو کې ګرځنده روغتیايي ټیمونه جوړ شوي، خو په وروستیو کلونو کې د مالي سرچینو کمښت، د نړیوالو مرستو راکمېدو او موسمي بدلونونو له کبله یې فعالیتونه یا درېدلي او یا هم په ځینو برخو کې ځنډول شوې دي.
