د کندهار ولایت سپین بولدک ولسوالۍ مرکز کې چې زرګونه کورنۍ په کې اوسیږي، تر ځمکې لاندې اوبو کچه يې د پام وړ ټیټه شوې او اوسېدونکي يې د څښاک پاکو اوبو له جدي کمښت سره مخ دي.
د یادې ولسولۍ اوسېدونکي وايي، د څښاک پاکې اوبه په بیه رانیسي خو په پنځو ورځو کې یو ځل د اوبو پېرلو نوبت ورسیږي.
دوی زیاتوي، د ګرمۍ په موسم کې یاده ستونزه نوره هم زیاتېږي.
د سپين بولدک اوسېدونکي له سرپرست حکومت غوښتنه کوي چې د پاکو اوبو شبکې ورته فعالې کړي.
د سپین بولدک ولسوالۍ یو تن اوسېدونکی ملا پاینده خان وايي: « له اوبو سره ډېر په تکلیف یو. یوه ټاکنۍ په یو زر ۴۰۰ اخلو. کله چې اوبه خلاصې شي، په پنځو ورځو کې نوبت را رسېږي. موږ غواړو د اوبو ستونزه مو هواره شي.»
د سپین بولدک ولسوالۍ یو بل اوسېدونکی صلاح الدین وايي:« د څښاک اوبه ډېرې کمې دي، په برمو کې هم اوبه کمې شوې. په تېر دوبي کې داسې وختونه راغلل چې په یوه اوونۍ کې به هم د چا کور کې اوبه نه وې.»
د سپین بولدک ولسوالۍ اوسېدونکی محمد وايي:« اوبه نه لرو، یوه ټاکنۍ په ۳ زره کلدارې له یارو کارېز راوړي.»
ځايي مسوولین هم د اوبو د کمښت ستونزه مني خو د حل ډاډ يي ورکوي.
د یادې ولسوالۍ د ښاروال مولوي لطف الله په خبره، اوس مهال د ۵ زرو کورنیو لپاره د څښاک پاکو اوبو د شبکې جوړولو چارې رواني دي او ډېر ژر به خلک ورڅخه برخمن شي.
لطف الله په دې اړه وايي: « د بولدک خلکو لپاره د پاکو اوبو برابرولو پژوژه تقریبا ً درې کاله کېږي چې پيل شوې ده. تر اوسه له ۶۰ تر ۶۵ میلیونو لګښت پرې راغلی او نور لګښت هم غواړي. زموږ له برآورد سره سم به دا اوبه په لومړي سر کې ۵ زرو کورنیو ته بسنه وکړي، خو موږ هڅه کوو دا تر ۱۰ زرو کورنیو پورې ورسوو.»
د کندهار سپین بولدک ولسوالۍ ډیورنډ فرضي کرښې ته نږدې لویه او ګڼ نفوسه ولسوالي ده چې ډېر ستر اقتصادي بازارونه لري.
د دې سیمې خلک اندېښنه لري، که د اوبو ستونزه هواره نه شي، ښايي بل ځای کډه کولو ته اړ شي.
