د امريکا ولسمشر ډونالډ ټرمپ اعلان کړی، چې له افغانستانه د بهرنیو ځواکونو د وتلو پرمهال د کابل پر هوايي ډګر د بريد يو مسوول کس يې د پاکستان پر همکارۍ په پاکستان کې نيولی دی.
ټرمپ ويلي، ياد کس د هغه بريد طراح دی چې د ۲۰۲۱ کال په اکسټ کې د کابل پر هوايي ډګر وشو او په پایله کې يې د شاوخوا ۱۸۳ عامو افغانانو په شمول ۱۳ امريکايي سرتېري ووژل شول.
له دې سره، د پاکستان لومړي وزير شهباز شريف هم تایيد کړی چې ياد کس یې امريکا ته سپارلی دی. نوموړي ويلي، د داعش دغه افغان غړی د يو لړ عملياتو په پايله کې ډيورنډ فرضي کرښې ته څېرمه نيول شوی دی.
د اسلامي امارت مرستیال ویاند حمد الله فطرت بیا وايي، د کابل پرهوايي ډګر د بريد مسووليت داعش ډلې منلی و او په پاکستان کې یې نیول کېدل په دې مانا دي چې داعش په هماغه هېواد کې روزنځايونه
فطرت زیاتوي: « دا د داعش مربوطه پېښه وه او هغه مهال یې یو برید ترسره کړی و. د دې پېښې په تړاو په پاکستان هېواد کې د دې ډلې د یوه کس نیول کېدل په خپله د دې پخلی کوي چې په دې جغرافیا او خاوره کې د داعش پټنځایونه او روزنیزې اډې لري او همدارنګه د دې ثبوت هم دی چې داعش نور په افغانستان کې د پټېدو ځای نه لري.»
