د کابل او سلام اباد له خوا د يو بل تورنولو په لړ کې دا ځل د اسلامي امارت سرپرست حکومت پاکستان تورن کړی چې د افغانستان پرمختګونه نه شي زغملی او د مخنيوي لپاره يې په نړيواله کچه منفي تبليغات کوي.
د سرپرست حکومت وياند ذبيحالله مجاهد له شمشاد سره ځانګړې مرکه کې وايي، په داسې حال کې چې پاکستان د يادو پرمختګونو د ډپ کولو په موخه ځينې وسله والې ډلې وسيله ګرځوي، خو دا کړنې يې د دوی له سترګو پټې نه دي.
مجاهد زیاتوي: « متأسفانه هلته حاکمه او مسلطه کړۍ د افغانستان پر وړاندې ښه نیت نه لري، داسې ښکاري چې ښه نیت نه لري. دوی وخت په وخت زموږ د پرمختګونو پر وړاندې موقف نیسي، توطیې جوړوي او پر نړیوال سټېج د افغانستان پر ضد تبلیغات او پروپاګند کوي. همدارنګه په امنیتي لحاظ هم هڅه کوي په خپله خاوره کې ځینې شریرې کړۍ جوړوې او ترې ګټه واخلي، په ځانګړې توګه داعش غوندې پدیدې نه هم دوی استفاده کوي، پټنځایونه یې ورکړي، روزنځایونه یې ورته چمتو کړي، تمویل یې کوي او د خپلو موخو د تحقق لپاره یې افغانستان ته را استوي.»
د سیاسي چارو یو شمېر شنونکي هم د وسيلې په توګه د پاکستان له لوري د وسله والو ډلو د کارېدو له ادعا سره موافق دي، خو په خبره يې دغه هېواد پر دې سربېره هم د افغانستان په ګرم ګڼلو سره د کابل پر وړاندې پر تشدد ولاړو پالیسيو پټولو هڅه کوي.
د سیاسي چارو شنونکی زلمی افغانیار وايي: « په تېرو درېیو کالو کې د پاکستانیانو د انتقاد ګوته تل د افغانستان خواته وه، دا په داسې حال کې ده چې د تروریزم خوندي ځاله له ډېورنډ کرښې ها خوا د پاکستان تر کنټرول لاندې سیمو کې دي. زه تمه لرم پاکستانیان دې پایلې ته رسېدلي وي چې په ګاونډ کې د سیاسي ثبات لرونکی افغانستان د دوی پر ګټه دی؛ که چېرې تقابل لري، باید د خبرو اترو له لارې ورته د حل لارې ولټوي.»
ځینې نور بیا په افغانستان کې له هر نظام سره د اسلام اباد تقابل تاريخي دوښمني بولي او زياتوي، د ياد تقابل په پايله کې بې ثباته افغانستان د پاکستان د بقا لپاره حياتي ارزښت لري.
د نړیوالو چارو شنونکی امین ګران وايي: « د پاکستان پوځي سټېبلېشمنټ او استخبارات د افغانستان په داخلي چارو کې د پاکستان له مصنوعي جوړښت راهیسې بې شرمانه لاسوهنه کوي. تروریزم د پاکستان لپاره د عاید یوه منبع ده. دوی تل غواړي چې افغانستان باید بې ثباته او نا آرامه وي او دوی له دې لارې ډالري عواید ترلاسه کړي.»
له دې وړاندې هم سرپرست حکومت پاکستان تورن کړی چې ترخپل کنټرول لاندې خيبر پښتونخوا او بلوچستان کې يې د افغانستان ضد عناصرو ته خوندي پټنځايونه ورکړي او په افغانستان کې ترسره شوي خونړي بريدونه هم له همدې مرکزونو پلان شوې دي.
