د کرنې، اوبو لګولو او مالدارۍ وزارت چارواکي وایي، په بلخ، جوزجان او فاریاب ولایتونو کې قوشتېپې کانال ته څېرمه پر۲۰۰ زره هکټاره ځمکې د کرنيزو او صنعتي کمپلېکسونو جوړېدو لپاره ځمکه تثبیت او ځانګړې شوه.
ټاکل شوې راتلونکو درېیو کالو کې د قوشتېپې کانال په څنډو کې پرتو دغو ځمکو باندې درې ستر کمپلېکسونه جوړ شي.
د کرنې وزارت ویاند مصباح الدین مستعین وايي:« په شمالي ولایتونو کې د قوشتېپې ملي کانال پر ځمکو د کرنیزو او صنعتي کمپلېکسونو د جوړولو په موخه، د ۲۰۰ زره هکټاره خمکو د تثبیت په موخه غونده جوړه شوه. په دې غونډه کې د کرنې وزارت د اراضیو عمومي رییس مولوي محمود مظلوم، د ملي پراختیا شرکت عمومي اجرائیوي رییس عبدالرحمن عطاش او د اراضۍ لوی ریاست یو شمېر رییسانو، تخنیکي او حقوقي سلاکارانو ترڅنګ، د ملي پراختیا شرکت یو شمېر مسوولینو هم ګډون درلود. ناسته کې د اراضیو عمومي رییس مولوي محمود مظلوم وویل، د اسلامي امارت د کرنې، اوبو لګولو او مالدارۍ وزارت مسوولین او کارکوونکي تل ملي پروژو ته لومړیتوب ورکوي او کارونه په ډېرې چټکۍ سره پرمخ وړي.»
بله خوا، د اقتصادي چارو شنونکي د قوشتېپې کانال ته څېرمه ځمکې د زراعت لپاره مناسبې بولي او د یادو کمپلېکسونو جوړېدو ته په اشارې وايي، پر دغو ځمکو پانګونه د صنعت او کرنې د ودې لپاره ګټوره ده.
د اقتصادي چارو شنونکی سید محمود نوري وايي: « د افغانستان د اقتصاد لویه برخه کرنیز محصولات جوړوي، خو دغه محصولات له دې وړاندې په دودیزه توګه ترلاسه کېدل او دغه کار په مخامخ توګه د محصولاتو پر تولید اغېز درلود. د دې کمپلېکسونو په جوړېدو سره به د دې زمینه برابره شي چې زموږ کرنیز سکټور نوی او عصري شي او له نویو وسایلو برخمن شي.»
د اقتصادي چارو شنونکی هادي بلخوال وايي: « په دې سره کرنیزه پراختیا او اقتصادي وده راځي، اوبه به مدیریت شي، خلکو ته به د کار زمینه براره شي د دښتو او رېګونو زیاتېدو مخنیوی کېږي او دغه راز د اقلیمي بدلونونو او چاپېریال ساتنې په برخه کې ډېرې ښې اغېز لري.»
په ورته مهال، که څه هم عام خلک وروستیو وچکالیو د کرنې په اړه ناهیلي کړي، خو په خبره یې، د قوشتېپې کانال یې هیلې یوځل بیا را ژوندۍ کړې او تمه لري چې له بشپړېدو سره به د غلې دانې له اړخه بډایه شي.
د بلخ یو تن اوسېدونکی وايي: « اوس د غنمو له کمښت سره مخ یو، خو که اوبه راشي غنم به پرېمانه شي. د کښت او کر په زیاتېدو سره به ګڼو خلکو ته د کار زمینه برابره شي او خارج ته له تللو به راوګرځي. کله چې ځمکه ډېره شي، کرنه او دهقاني به هم ورسره ښه شي.»
د بلخ یو تن بل اوسېدونکی وايي: « زموږ د خلکو کروندګر او دهقانان له وچکالیو ډېر زیات زیانمن شوې دي. موږ تمه لرو چې کله دغه اوبه تر اندخوی پورې ورسېږي، موږ ژمنه کوو چې نه یوازې د هېواد شمال، بلکې ټول افغانستان به د غنمو له پلوه اکمال کړو.»
دا په داسې حال کې ده چې د ملي پراختیا شرکت تېره اوونۍ وویل، د قوشتېپې کانال د دویم فاز د کېندلو چارې ۸۷ سلنه او د سربند جوړولو چارې يې ۷۵ سلنه بشپړې شوې دي.
د دې سترې ملي پروژې په بشپړېدو سره به په بلخ، جوزجان او فاریاب ولایتونو کې۵۵۰ زره هکټاره شاړې ځمکې له آمو سیند خړوبې شي.
