د روسیي ټاس خبري آژانس راپور ورکړی چې د دې هېواد د بهرنیو چارو وزیر سرګي لاوروف د تاجیکستان له بهرنیو چارو وزیر سراج الدین مهرالدین سره د دوه اړخیزو مسایلو ترڅنګ د افغانستان او سیمي پر وضعیت هم خبرې کړې.
په راپور کې د لاوروف له قوله راغلي، روسیه به ډېر ژر په تاجیکستان کې د خپل ۲۰۱ پوځي اډې هوايي ځواک برخه پیاوړې کړي او د تاجیکستان په سوېلي پوله کې مېشت تاجیکستاني ځواکونه به لا زیات تجهیز کړي.
راپور زیاتوي، لاوروف د ګډ امنيتي تړون (سي.اېس.ټي.او) سازمان د پرېکړې له مخې، د افغانستان او تاجیکستان پر ګډه پوله له افغانستانه د احتمالي ګواښونو مخنیوي لپاره د امنیتي کمربند رامنځته کول مهم ګڼلي دي.
لاوروف زیاته کړې:« له افغانستانه د احتمالي ګواښونو په تړاو مو د ګډ امنيتي تړون او شانګهای همکاريو فعال سازمانونه رامنځته کړې دي او د تاجیکستان په ګډون له ګاونډيو هېوادونو سره شریک یو شمېر مکانېزمونه لرو، لکه مسکو فارمټ چې له مخې یې امنیتي همکارۍ تقویه کولی شو.»
د ګډ امنیتي تړون سازمان ته د افغانستان او تاجیکستان په ګډه پوله د امنیتي کمربند رامنځته کولو لومړی وړاندیز په ۲۰۲۳ زېږدیز کال کې د تاجیکستان ولسمشر امام علي رحمان له لوري شوی و.
بهرنیو چارو وزارت سره مو د روسیې بهرنیو چارو وزیر تازه څرګندونې شریکې کړې، خو له مکررو اړیکو سره سره يې په دې اړه ځواب رانه کړ.
خو له دې وړاندې سرپرست حکومت ټينګار کړی، هېچا ته اجازه نه ورکوي چې د افغانستان خاوره د کوم بل هېواد پر ضد وکاروي.
له دې سره، د چارو یو شمېر کارپوهان د ترهګرۍ پر وړاندې مبارزه د ټولو هېوادونو مشترک مسوولیت ګڼي او وايي، د روسیې په ګډون د سمیې او ګاونډ هېوادونه غواړي د مشترک ګواښ لپاره متحدانه مبارزه وکړي.
د سیاسي چارو شنونکی نجیب الرحمن شمال وايي:« په داسې حال کې چې د تروریزم او ترهګریزو ډلو پر وړاندې مبارزه یوازې د افغانستان مسوولیت نه دی بلکې د نړۍ ټول هېوادونه او په ځانګړې توګه روسیه او د افغانستان ګاونډي هېوادونه باید د افغانستان له سرپرست حکومت سره په تفاهم په هر هېواد او سیمه کې د ترهګرو د ځالو او پټنځایونو له منځه وړلو لپاره ګډ نظامي او استخباراتي پروګرامونه عملي کړي.»
ځینې نور بیا باور لري چې زبرځواک هېوادونه دا ډول بې ثباتي تر ډېره د خپلو پالیسو د تقابل او تعقیب لپاره رامنځته کوي.
د سیاسي چارو کارپوه عزیز معارج وايي: « د نړۍ زبرځواک هېوادونه او په ځانګړې توګه شرق او غرب بلاکونه چې په سر کې یې روسیه او امریکا ځای لري، دوی د یو او بل له پروګرامونو خبر وي او پوهېږي چې په سیمه کې څه کوي یا څه روان دي. د مثال په توګه، روسیه پوهېږي چې امریکا دلته څه پروګرام لري یا راتلونکي کې د داعش، القاعدې او طالبانو لپاره څه پلانونه لري. نو دوی په دې تړاو بې تفاوته نه پاتې کېږي او خپلو ګټو ته ګوري. که چېرې امریکا دلته ګډوډي رامنځته کوي، روسان هم په کې ځان شریکوي او خپلې ګټې خوندي کوي.»
تېره اوونۍ د ملګرو ملتونو امنیت شورا هم له افغانستانه نورو هېوادونو ته د داعش امنیتي ګواښ په اړه اندېښنه ښودلې وه، خو سرپرست حکومت بیا په ځلونو ویلي، د یادې ډلې نیول شوي کسان د ګاونډیو او سیمې یو شمېر هېوادونو وګړي دي.
