عام افغانان له ډېرو کالونو راهیسي د سوداګرۍ، درملنې او د کورنیو تر منځ د تګ راتګ په موخه پاکستان ته ځي راځي. خو په وروستيو کې له تور بازار پرته د دې هېواد د وېزې ترلاسه کول حتا ناممکن کار دی.
ځينې کسان وايي، د پاکستان وېزو تر لاسه کولو په موخه يې په وار وار نوم لیکنه کړې، خو له زیات انتظار سره سره يي بیا هم غوښتنه رد شوې.
دوی وايي، اړ دي چې د بېلابېلو اړتیاوو لپاره پاکستان ته تګ راتګ وکړي.
دوی وايي، نه شي کولی په نورمال توګه د پاکستان وېزې ترلاسه کړي، خو په خبره يې په تور بازار کې همدا وېزه بيا په ۱ زر او ۵۰۰ ډالر خرڅېږي.
ځينې نور بيا ادعا کوي چې یو شمېر کسان له پاکستاني ځواکونو سره لاس لري او ډيورنډ فرضي کرښې ته په رسېدو سره جعلي وېزه ورکول کېږي چې د دوی په خبره، د دې کار له امله ډېر کله د نيول کېدو او زنداني کېدو له خطر سره هم مخامخ کېږي.
د پاکستان ویزه اخیستونکی نعمت الله افغانپال وايي: « ما د پاکستان د وېزو لپاره دوه دری ځلې په آنلاین بڼه ثبت نام وکړ، خو متأسفانه رد شو. اما په تور بازار کې دغه وېزې له زر ډالرو تر یوز پنځه سوه او ان ۲ زره ډالرو پورې پیدا کېږي. دغه کار زموږ هېوادوال له ډېرو غټو ستونزو سره مخامخ کړي.»
سياحتي شرکتونه که څه هم په تور بازار کې د پاکستان د وېزو خرڅلاو مني، خو وايي د وېزو صدور د پاکستان حکومت اړوند دی او دوی په کې هېڅ راز لاسوهنه نه شي کولی.
کابل کې د سياحتي شرکت مسوول وايي: « د پاکستان د وېزې اصلي قیمت ۸.۷۰ امریکايي ډالره دی. دا هر شرکت چې د وېزو په اخیستلو کې کار کوي، باید حتمن د سفارت په داخل کې یو کس ولري، یا دغه لاسرسی په پاکستان کې ورکول کېږي یا هم دلته سفارت کې. دا کسان با هر یو خپلې پیسې غواړي.»
د یوه بل سیاحتي شرکت مسوول وايي: « یو ډول یې تحصیلي وېزې دي، یو یې هم شپږ میاشتنۍ سیاحتي وېزې دي او بل ډول هم د ناروغۍ اړوند درې میاشتنۍ وېزې دي. دا مهال د شپږمیاشتنۍ سیاحتي وېزې بیه ډېره لوړه ده او تر زر امریکايي ډالرو پورې رسېږي.»
د یوه بل سیاحتي شرکت مسوول وايي: « ټاکل شوې تر ۳۰ سلنو غوښتونکو ته وېزې په نورماله بڼه راشي، خو ۷۰ سلنه نورې وېزې په نورمال بڼه نه راځي.»
بله خوا، سرپرست حکومت وايي، د پاکستان وېزو په ترلاسه کولو کې يې د خلکو ستونزې له ياد هېواد سره شريکې کړې او له مقابل لوري يې د حل ډاډ ترلاسه کړی.
د بهرنیو چارو وزارت مرستیال ویاند ضیا احمد تکل وايي: « په دې تړاو مالومات روان دي چې موږ څه کړي، موږ په دې تړاو پخوا هم له دوی سره مختلفې ناستې کړې او د دوی له خوا وعدې هم راکړل شوې دي.»
د سرپرست حکومت له واک ته رسېدو وروسته یو شمېر هېوادونو افغانانو ته د وېزو ورکول بند کړل او هغه هېوادونه چې وېزې ورکوي، خلک يې د ستونزو له امله له ورکړې په نه ورکړه خوښ دي.
