په کابل ښار کې د نوي خیرخوا سوداګریز مرکز د پرانيستې مراسمو کې ګڼ شمېر حکومتي چارواکو ګډون وکړ.
د دې سوداګریز مرکز د رغولو چارې په ۱۴۰۱ کال کې د ماليي وزارت، افغان ملي بانک او کابل ښاروالۍ له لوري له خصوصې سکتور سره په همغږۍ پیل او تازه يې چارې د ۳۲ میلیونو ډالرو په لګښت بشپړې شوې.
د ریاست الوزرا اداري مرستیال د افغانستان په اقتصادي وده کې د خصوصي سکټور ونډه حياتي بولي او غوښتنه کوي چې حکومت خصوصي سکټور ته د پراخ فعاليت زمينې برابرولو ته ژمن دی.
خو د اقتصادي مسايلو ترڅنګ نوموړي د ځينو سياسي مسايلو يادونه هم وکړ.
حنفي پرته له دې چې د کوم چا له لوري د لاسوهنې څرنګوالی واضېح کړي، وویل، نړيوال دې د افغانستان په چارو کې لاسوهنه نه کوي.
حنفي زیاته کړه: « هغوی دې هم د افغانستان په داخلي چارو کې لاسوهنه نه کوي، موږ هم د هېڅ یوه ګاونډي هېواد په کورنیو چارو کې لاسوهنه نه کوو. دا یوه طبیعي خبره ده، که څوک د افغانستان په کورنیو چارو کې لاسوهنه کوي، په دې صورت کې د افغانستان شرعي، اصولي او نړیوال حق دی چې له ځانه دفاع وکړي.»
له دې سره، نور چارواکي هم مني چې په افغانستان کې د بې روزګارۍ کچه لوړه شوې او له امله يې خلک له اقتصادي ستونزو سره مخ دي.
دوی له سودګرو غواړي چې په خپلې پانګونې سره د کاري فرصتونو په ایجاد کې همکاري وکړي.
د کار او ټولنيزو چارو وزارت سرپرست عبدالمنان عمري وايي: « په داسې یوه وخت او حالاتو کې چې په افغانستان کې د بېکارۍ کچه لوړه ده، د دغه شان پروژو په عملي کېدو سره به زموږ ډېر شمېر هېوادوالو ته د کار زمینه برابره شي.»
بله خوا، د چارو ادارې چارواکي وايي، د نوي خیرخوا سوداګري مرکز پروژې ترڅنګ به راتلونکي کال کې هم زیات شمېر لويي او وړي پروژې تطبيق شي.
د چارو ادارې د پانګونې اسانتیا رییس احمد ضیا خالد وايي: « موږ په پام کې لرو چې په نوي کال کې هم له ۹۰ زیاتې نوې پروژې چې ارزونه یې بشپړه شوې، کارونه یې پیل کېږي.»
یاد سوداګریز مارکیټ چې د کابل په دويمه ناحیه کې موقعيت لري، په ۱۳۹۷ لمریز کال کې د یوې اورلګېدنې په پایله کې په بشپړ ډول وسوځېده او سوداګرو ته په کې میلیونونه ډالر زیان واوښت.
