د زندانونو چارو د سمون ادارې او همکارو بنسټونو له لورې د هېواد په بندخونو کې پر۱۱ زره بندیانو او څه باندې ۱۱زره توقیفیانو او محجوزینو د ژمنیو اړتیا وړ توکو شاوخوا۴۰ زره کڅوړې وېشل پيل شوې.
د دغې ادارې رییس وايي، په دې کڅوړو کې تودې کمپلې، ګرمې جامې، پټوان، څادرونه، جمپرونه، جورابې، د ځان او جامو وینځلو صابونونه، د غاښونو کریم او بورسونه او ځینې نور ژمني او اړین توکي شامل دي.
محمد یوسف مستري په خبره، د دې ادارې اړوند ټولو بدخونو کې د بندیانو ژوندانه او روغتیا ته د لا ډېرې پاملرنې په موخه، د هغوی د ساتلو ځایونو(سلولونو) د ګرموالو په هدف یې پوره امکانات برابر کړي دي.
مستري زیاته کړې:« موږ د ژمي پرمهال په یو شمېر ولایتونو کې د لرګیو له بخاریو ګټه اخلو، په ځینو ولایتونو کې له ګازو کار اخلو، حتا له ډبرو سکرو ګټه اخلو او په هغو ولایتونو کې چې برېښنا یې دایمي ده، له برېښنا ګټه اخلو. د بندیانو خونې تودې دي او ګرمې اوبه هم ورکول کېږي، یا هم د اوبو او کوټو د تودولو لپاره امکانات په واک کې ورکول شوې دي.»
مستري دغه راز وايي، د بندیانو د اړتیاوو پوره کولو لپاره تودې اوبه هم چمتو شوې دي.
د مستري په خبره، دغه اداره تل هڅه کوي چې بندیانو ته لازمې اسانتیاوې برابرې او هر کال د ژمي په موسم کې محبوسینو، تورنو کسانو او محجوزینو ته د سلولونو د ګرمولو ترڅنګ، ګرمې جامې، کمپلې او نور اړین توکي وېشي.
هغه زیاتوي: « د ژمي لپاره په مرکز کې هر بندي ته یو پټو ورکړل شو خو ځینو ولایتونو کې ونه رسېدل. همدارنګه هر بندي ته یوه کمپله او په ځینو سړو ولایتونو کې دوې کمپلې ورکول شوې دي. دا په داسې حال کې ده چې د تېر کال کمپلې هم له دوی سره شته دي. همدارنګه د ژمي لپاره جورابي، جاکټونه او نور هر ډول اړین توکي ورکړل شوې دي.»
د څرخي پله مرکزي زندان کې بندي کسان وايي، له دوی سره د ژمي په ساړه موسم کې د ژمنیو توکو مرسته شوې او ستونیزو ته يې پر وخت رسېدنه کېږي.
په څرخي پله زندان کې یو تن بندي وايي: « له ټولو محبوسینو سره مرسته شوې، په دې کې کمپلې، پټوګان او جورابي شاملې دي او په ټولو خونو کې هر ډول امکانات برابر دي. همدارنګه ټول تشنابونه ګرمې او سړې اوبه لري او په دې تړاو ستونزه نه شته.»
د څرخي پله یو بل بندي وايي: « د ژمي په پيل کې یې هر ډول اړین توکي موږ ته را ووېشل چې په کې جورابې، زېرلباس، نوې کمپلې، د غاښو بورسونه او مسواکونه، صابونونه او نور توکي شامل وو. د تېر کال زاړه وسایل یې له موږ ټول کړل.»
د زندانونو چارو د سمون ادارې د مسوولینو په وینا، د ژمي په ساړه موسم کې د زندانیانو اړتیاوې ډېریږي او په دې برخه کې د زندانونو چارو د سمون ادارې تل هڅه کړې چې بندیانو ته لازمې اسانتیاوې برابرې کړي.
