د تاجکستان بهرنیو چارو وزارت د یوې اعلامیې په خپرولو سره ویلي، د دې هېواد بهرنیو چارو وزیر سراج الدین مهرالدین د افغانستان لپاره د اروپايي ټولنې له استازي توماس نېکلاسن سره په پلازمېنه دوشنبې کې د افغانستان د روان وضعیت په اړه خبرې کړي.
په اعلامیه کې راغلي، په دې لیدنه کې له افغانستانه سيمې ته د اوسنیو ګواښونو او ننګونو پر وړاندې د مبارزې لپاره د تاجکستان او اروپايي ټولنې پر ګډه همغږۍ هم ټينګار شوی.
د اعلامیې یوه برخه: « د افغانستان وضعیت په اړه اغېزمنې خبرې وشوې او همدا راز د موجوده ګواښونو او ننګونو لپاره پر همغږۍ بحث وشو.»
اعلامیه زیاتوي، د اروپايي ټولنې او تاجکستان ترمنځ په ګڼو برخو کې دوه اړخیزې همکارۍ هم مهمې ګڼل شوې دي.
په ورته مهال د سیاسي چارو کارپوهان د ګاونډيو هېوادونو دا ډول څرګندونې د خپلو سیاسي اهدافو برخه بولي او زیاتوي، د افغانستان له وضعیت د اندېښنو لرلو په صورت کې باید ګاونډي هېوادونه د سرپرست حکومت له چارواکو سره مخامخ خبرې وکړي.
د سیاسي چارو کارپوه محمد زلمی افغانیار وايي: « د افغانستان په اړه د دوی اندېښنې سیاسي موج سواري ده. که زموږ ګاونډیان ریښتیا هم صادق دي، په خپلو خاورو کې جوړ کړي کمپونه او د دوی تر مدیریت لاندې افراد دې افغانستان ته واستوي، ترڅو د ملي ګټو په چوکاټ کې سره کېني او ستونزې حل کړي. د سیاسي ثبات لرونکی افغانستان د سیمې او نړۍ په امنیت ټینګولو کې ښه رول لوبولی شي. زه تمه لرم اجازه ورکړي چې افغانان له سرپرست حکومت سره ستونزه خپله حل کړي، نه د هغوی د هغو ناوړه اهدافو پر بنسټ چې دوی پرې بحث کوي.»
د سیاسي چارو کارپوه فیض محمد ځلاند وايي: « که غواړو چې سیمه د ځان په اړه ډاډمنه کړو او ښې اړیکې ورسره ولرو، ښه به دا وي چې خپله کورنۍ دنده ترسره کړو. موږ وینو چې د سیمې هېوادونه لکه تاجیکستان، ازبېکستان او قزاقستان په خپل کور کې ډېر پياوړي دي، هم په اقتصادي او هم په ټولنیز لحاظ ډېر ټیکاو لري او غواړي چې موږ هم د همدې ټیکاو له مخې ورسره مرسته وکړو او اجازه ورنه کړو چې زموږ کاواکي او کم واکي په سیمه ناوړه اغېز وکړي.»
له دې وړاندې د ګډو ګټو سازمان چې تاجکستان، روسیه، ازبېکستان او یو شمېر نور هېوادونه یې غړیتوب لري، د تاجکستان ولسمشر امام علي رحمان له افغانستان سره د ګډې پولې د امنیت خوندیتوب او هلته د یاد سازمان د غړیو هېوادونو مشترکه همکاري مهمه بللې وه.
اسلامي امارت د تاجیکستان په ګډون ټولو هېوادونو ته په کراتو ډاډ ورکړی چې د افغانستان خاوره به د هېڅ هېواد پر وړاندې کارولو ته نه پرېږدي.
