که څه هم د هېواد په پولي بازارونو کې د ډالرو پر وړاندې د افغانیو بیه راټیټه شوې، خو د افغانستان بانک ډاډ ورکوي چې د افغانۍ ارزښت ساتنې لپاره به اړین ګامونه پورته کړي.
په دې تړاو د افغانستان بانک له لوري خپره شوې اعلامیه کې ډاډ ورکړل شوی چې د افغانۍ د ارزښت ساتلو لپاره کافي سرچینې په واک کې لري او د پولي بازارونو او مالي بنسټونو د اسعاري اړتیاوو پوره کولو لپاره اړین ګامونه ترسره کوي.
د افغانستان بانک اعیلامیې یوه برخه: « خپلو ټولو هېوادوالو ته ډاډ ورکوو چې د افغانستان بانک د تېر په څېر د بیو د ثبات او د افغانۍ د ارزښت ساتنې لپاره اړین اقدامات ترسره کوي. په پولي بازارونو کې نوسانونه د نورو هېوادونو په څېر یو طبعي او معمول اقتصادي حالت دی چې د اندېښنې وړ خبره نه ده. د افغانستان بانک کافي سرچینې په واک کې لري او د بیو د ثبات، نقد ینګۍ د پولي بازارونو او مالي بنسټونو د اسعاري اړتیاوو پوره کولو لپاره اړین اقدامات ترسره کوي.»
په همدې حال کې د افغانستان د صرافانو سراسري ټولنه هم ډاډ ورکوي چې د ډالرو د بیې لوړوالی د اندېښنې وړ مساله نه ده او د افغانیو د ثبات ساتنې لپاره به د دوشنبې په ورځ په پولي بازارونو کې ۲۵ میلیونه امریکايي ډالر لیلام ته وړاندې او همدا راز به دغه لړۍ په ټول هېواد کې روانه کړي.
د افغانستان د صرافانو او پولي خدمتونو ټولنې رییس بهرام خان ځدراڼ وايي: « نن په مارکېټ کې افغانۍ د ډالرو په مقابل کې ۸۰ او ۸۱ ده. افغانۍ ډېره نه ده غورځېدلې او فکر کوم نوره به ونه غورځېږي. د افغانستان بانک د سبا ورځې لپاره ۲۵ میلیونه ډالره لیلام اعلان کړی او له دې سره یې ویلي چې دغه شان لیلام به په ټول افغانستان کې پيل کړي. دا لیلام به نه یوازې په کابل کې کېږي بلکې په ټول افغانستان کې به کېږي، ترڅو افغانۍ خپل ځای ته راغلې نه وي. زه خپلو هېوادوالو ته ډاډ ورکوم چې تشویش دې نه کوي او افغانۍ به خپل ځای ته بېرته راشي.»
د اقتصاد چارو پوهان بیا په دې باور دي چې د افغانۍ ثبات او ارزښت ساتنې لپاره اړینه ده چې د هېواد سوداګرۍ، اقتصادي پرمختګ، خلکو ته د کاري زمینې برابرولو، په راکړه ورکړه کې له پولي واحدونو په پراخه توګه ګټه اخیستنې ته جدي پاملرنه وشي.
دوی په دې باور دي چې د پیسو د دایمي ثبات لپاره د سوداګرۍ بیلانس ته چې صادرات او واردات دي، باید زیاته پاملرنه وشي.
د اقتصادي چارو کارپوه نورالله عزیز وايي: « لازمه ده چې مرکزي بانک د دغو عواملو په برخه کې کوټلي ګامونه واخلي او د پیسو د ثبات لپاره په مختلفو وختونو کې د هغه څخه استفاده وکړي. په دې کې د تجارت بحث، د هېواد د اقتصادي وضعیت بحث، که خلکو ته کار موندنه ده، که په داخلي معاملاتو کې له پولي واحدونو پراخه ګټه اخیستنه ده او یا هم د بهرنیو اسعارو د راتګ بحث، دا ټول په خپله برخه کې د پیسو د ثبات لپاره مهم بلل کېږي. هغه عوامل چې د پیسو په دایمي ثبات باندې تأثیر لري، د هېواد تجارت، د تادیاتو بیلانس او ترڅنګ یې د هېواد عمومي اقتصادي وضعیت دی.»
د پوهنتون استاد سید مسعود وايي: « اوس هم کولی شي چې له پولي زېرمو په اوونۍ کې ۴۵ میلیونه نه بلکې ۲۰ میلیونه ډالره وباسي او لیلام یې کړي. دوی کولی شي په دوو میاشتو کې ۱۶۰ میلیونه ډالره له دې زېرمو وباسي او ګټه ترې واخلي.»
له هغې وروسته چې ډونالډ ټرمپ د امریکا ولسمشریزې ټاکنې وګټلې او پر هېوادونو یې خپلې بشري او نقدي مرستې بندې کړې، د نړۍ او افغانستان په بازارونو کې د نورو اسعارو پر وړاندې د ډالرو بیه لوړه شوه او دغه کار د خلکو اندېښنې زیاتې کړې.
