د دروېزه په نوم د هلمند ولایت اوسېدونکی چې ۸ کاله وړاندې یې د یو میلیون افغانیو په لګښت د لمریزې برېښنا پر مټ چلېدونکې ژرنده فعاله کړې وه، وایي مخکې کار ښه وو او ښه عاید یې ترلاسه کاوه، خو اوس یې کار کم او پیکه شوی دی.
د دروېزه په خبره، د طرحو د نه شتون له امله دغه ولایت کې سلګونه کسانو د ده په شان ژرندې جوړې کړې چې له امله یې نه دی ګټه کولی شي او نه هم هغوی.
ژرنده لرونکی دروېزه وايي: « تر دې وړاندې ښه و، خو اوس زما له ژرندې وروسته ګڼ شمېر نورو کسانو هم ژرندې جوړې کړې او په دې سره یې زما کارونه هم کمزوري کړل او د دوی خپل هم کمزوري دي. افغانستان کې دا دود ګرځېدلی چې یوچا کوم کار پيل کړ، نور هم د هغه په پله راونېږي. دا د دې سبب شوی چې د ټولو کاروبار خراب شي.»
د هلمند یو شمېر نور کاروبارایان هم ورته نیوکه لري.
دوی له سرپرست حکومت غوښتنه کوي هغو کسانو ته چې پیسې لري او غواړي کاروبار پیل کړي، د ټولنې له اړتیا سره سم، طرحې ورکړي او په دې سره نور پانګه وال له زیانمنېدو وژغوري.
د هلمند اوسېدونکی محب الله وايي: « له دولت غوښتنه کوو چې پانګه والو ته منظمې طرحې برابرې کړي، ترڅو هم دوی زیانمن نه شي او هم یې وطن ته ګټه ورسېږي.»
د هلمند اوسېدونکی عبدالمالک وايي: « له دولت غوښتنه کوو چې داسې نوې طرحې جوړې کړي چې عام ولس ته اسانتیاوې برابرې شي. باید نوي کارونه ترسره شي ترڅو نوي پرمختګونه وشي.»
د هلمند د سوداګرۍ خونې مسوولین هم دا ستونزه پرځای ګڼي او وايي، که پانګه وال د طرحو او نوي کاروبار د پیلولو لپاره مشورې ته ورشي، دوی به له اړتیا سره سم د کاروبار طرحې ورکړي او لازمه مرسته به یې وکړي.
د هلمند د سوداګرۍ او پانګونې خونې مرستیال روح الله بارک وايي: « هغه کسان چې کاروبار پيلوي، لومړي کوچني کارونه پيل کړي او بیا سره ډېر شي او له تاوان سره مخ شي. که چېرې دوی د کاروبار له پيلولو وړاندې راشي او له موږ مشوره وغواړي، موږه به سمه مشوره ورکړو. هرڅوک چې کاروبار پيلوي، باید د هلمند د سوداګرۍ خونې ته راشي، دلته موږ سره منظم ټیم دی او دوی ته به له اړتیا سره سمه مشوره ورکړل شي.»
دا په داسې حال کې ده چې په دې وروستیو کې په هلمند کې هم پانګونه زیاته شوې او د تولیدي کارخونو شمېر تر١٠٠ اوښتی.
د هلمند د پانګونې خونې مالومات ښيي چې په دې کارخونو کې شاوخوا ٧ زره تنو ته د کار زمینه هم برابره شوې ده.
