د افغانستان او پاکستان ترمنځ د کړکېچ وروستۍ څپې وروسته له هغې زور واخیست چې پاکستان د تېر ډسمبر پر ۲۴مه د پکتیکا ولایت په برمل کې هوايي بریدونه وکړل. په دې برید کې شاوخوا ۹۰ کسانو ته مرګ ژوبله واوښته.
سرپرست حکومت دا بریدونه وغندل او د افغانستتان پر حریم یې ښکاره تیری وباله. د ملي دفاع وزارت وویل، د پاکستانی د برید په ځواب کې یې د ډېورند فرضي کرښې هاغاړه ځینې اهداف پر نښه کړل.
تازه د پاکستان د لومړي وزیر سلاکار رانا ثناالله د یوې مرکې پرمهال د پاکستان له هوايي برید ننګه کړې او وايي، پاکستان له ځانه د دفاع او ساتنې په موخه پر افغانستان د دې ډول بریدونو حق لري.
هغه زیاته کړې: « ترکومه چې د کرښې پورې غاړې پورې تړلې خبره ده، هغه دا ده چې د نړیوالو اصولو له مخې که له کوم ځایه تاسو ته د ګواښ پېښېدو خطر موجود وي او یا له هغه ځایه نښې نښانې او چمتووالی ولیدل شي؛ نو دا ستاسو حق دی چې د ځان د ساتنې او حفاظت لپاره یې پر وړاندې اقدامات ترسره کړی.»
ثناالله دغه راز ویلي، د پاکستان پوځ به د ډېورند فرضي کرښې دواړه غاړې ته ټول هغه ګواښونه له منځ یوسي چې په وینا یې د دې هېواد امنیت ته خظر پېښوي.
له دې وړاندې د تېرې جمعې په ورځ د پاکستان لومړي وزیر شهباز شریف هم په یوې غونډه کې دغه برید غاښ ماتوونکی ځواب بللی و.
پاکستان تل ادعا کړې چې د ټيټيپي جنګیالي له افغانستانه د ډېورند فرضي کرښې هاغاړه پر پاکستاني اهدافو د بریدونو لپاره وراوړي؛ هغه ادعا چې اسلامي امارت تل رد کړې او وايي، په راتلونکي کې به پر افغانستان د پاکستان پوځي تېري ته سخت ځواب ورکړي.
د بهرنیو چارو وزارت سیاسي معین شېرمحمد عباس ستانکزی وايي: « مشکل هرڅه چې دی په خپل ملک کې یې دی، خپل خلک یې په مقابل کې په جنګ کې دي. هغه خلک چې نن د دوی پر وړاندې جنګېږي، که په هر نوم دي، زموږ خلک نه دي بلکې د دوی خپل خلک دي؛ خپلو خلکو سره کېنه، مشکل حل کړه. ته چې مشکل نه شې حل کولی، پر افغانستان او په اسلامي امارت د دې پړه اچول په هېڅ دلیل نه منل کېږي.»
خو د نړیوالو قوانینو له مخې د پاکستان دغه خبره چې پر افغانستان برید د ځان حق ګڼي، څومره پر ځای ده؟
د سیاسي چارو شنونکی عزیز معارج وايي: « ټول یې مات کړي دي، حتا هغه تفاهم چې د دواړو هېوادونو ترمنځ شوی، هغه یې هم د خپلو ګټو لپاره تر پښو لاندې کړي او د خپلو ګټو لپاره له هرې وسیلې کار اخلي. دا چې اوس وايي چې د نړیولو اصولو، طبعا ً کنوانسیون د ویانا یا د ملګرو ملتونو د اووم فصل منشور ته اشاره ده چې زه په افغانستان حمله کوم چې خپل دوښمنان یا له هغه ځایه پر ما حمله کېږي، هغه له منځه وړم. هغه ځانته شرایط لري.»
ځینې نور بیا د افغانستان او پاکستان ترمنځ د کړکېچ دوام او د اړیکو خرابېدل د دواړه هېوادونو پر زیان ګڼي.
په پاکستان کې آزاد خبریال طاهر خان وايي: « داسې یو سوچ و چې دا تشنج او کشیدګي کمول په کار دي. نو ممکن دا لږ وخت هم واخلي؛ ځکه چې بې اعتمادي له وړاندې هم موجوده وه او په دې شیانو باندې اختلاف و او دغې پېښې سره لا زیاته شوه. ګورئ پاکستان او افغانستان له داسې یوه حالت سره مخ دي چې په کې تعلقات تر فشار لاندې دي او خراب دي،خو دا به تر کومه پورې وي؟»
د سیاسي اړیکو خرابوالي منفي اغېزو ته په پام، دواړو خواوو سیاستوال او په تېره بیا افغان سیاسیون د سولې او خبرو اترو له لارې د دواړو هېوادنو ترمنځ د موجوده ستونزو د حل غوښتنې لري.
