په خوست ولایت کې د چهارشنبې پر ورځ د (۱۴۰۳ کال د لړم پر ) د ساري ناروغيو د تشخيص په موخه ځانګړی پرانیستل شو.
د دغه ولایت عامې روغتیا ریاست مسوولین وايي، دا مرکز د روغتيا نړيوال سازمان په ۲۵۰ زره امریکايي ډالرو مالي لګښت فعال او ګټه اخیستنې ته سپارل شوی.
دوی زیاتوي، په دې مرکز کې به پر ایډز (اېچ.آی.وي)، تور ژېړي، سپين ژېړي او ژېړ ژېړي سربېره د نورو بېلابېلو ساري ناروغيو تشخيص په وړيا ډول ترسره کېږي.
د خوست عامې روغتيا ریيس ډاکټر احمد مجاهد وايي: « په دې مرکز باندې ۲۵۰ زره امریکايي ډالره لګښت راغلی. دغه معاینات له دې وړاندې دلته نه وو او خلک به په ورځو ورځو انتظار وو. د دغو ناروغیو یو ټېسټ په ۲۵۰۰ افغانۍ کېده چې د خلکو وس ورته نه رسېده. نن مو په خوست کې دا مرکز پرانیست ترڅو د خلکو معاینات په وړیا توګه وکړي او ولس ورسره هوسا شي.»
په همدې حال کې، د خوست د طبي ټکنالوجېسټانو ټولنې مسوولین وایي، په دې مرکز کې له نویو ماشینونو وړاندې، دلته په اسانۍ د اېچ.آی.وي او تور ژېړي په څېر ساري ناروغيو تشخيص نه کېده.
دوی زیاتوي، له دې وروسته به پر يادو ناروغيو اخته ناروغان اړ نه وي چې د تشخيص لپاره کابل او يا هم پاکستان ته ولاړ شي.
د خوست د طبي ټکنالوجېسټانو ټولنې مشر محمد ګلاب توتاخېل وايي: « په خوست کې به داسې ناروغان وو چې له هغه به په تور ژېړي، سپین ژېړي، اېچ.آی.وي او نورو ناروغیو اخته وو، خو دا تشخیص به نه کېده چې د دوی ویروس ژوندی دی او که مړ. د دوی سمپلونه به یا پاکستان ته تلل یا کابل ته. د چا به چې وس او توان و، نو دا معاینات به یې وکړل خو که به یې وس نه و، هغه به نه کول. الحمدالله نن زموږ د عامې روغتیا په ریاست کې دا زمینه برابره شوه.»
په خوست کې د ساري ناروغیو د تشخیص او مخنیوي په موخه یاد مرکز او ماشین داسې مهال فعالیږي چې د عامې روغتيا رياست د مسوولينو په خبره، د سوېل ختيځ زون پر کچه دا يوازينی مرکز دی چې د خطرناکو ساري ناروغيو د تشخيص په برخه کې يې په فعاليت پيل وکړ.
