څه موده وړاندې یو شمېر اروپايي هېوادونو د افغانستان سفارتونو چارې وځنډولې او ورسره سم د سرپرست حکومت ځينو سرچينو شمشاد ته وويل، د يادو سفارتونو چارې به ژر دې حکومت ته وسپارل شي.
که څه هم له دې پرېکړې زیاته موده تېره شوه، خو تر اوسه يې چارې سرپرست حکومت ته نه دي سپارل شوي او په يادو هېوادونو کې د افغانستان سفارتي چاري پر ټپه ولاړې دي.
د سیاسي چارو شنونکي وايي، د سرپرست حکومت دې پرېکړې افغان کډوال له ګڼو ستونزو سره مخ کړي او باید ژر تر ژره د دې سفارتونو په بيا فعالولو سره دغه ستونزې هوارې شي.
د سیاسي چارو شنونکی فیض محمد ځلاند وايي: « په دې وروستیو کې چې کوم سیاسي ماموریتونه یا سفارتونه تړل شوي، له یوه نظره مثبت ګام دی؛ ځکه کله چې دولتونه موجود نه وي، د هغوی سیاسي استازولۍ هم باید ځای ناستو دولتونو ته ولېږدول شي. باید د افغانستان نوي حکومت ته د رسمیت پېژندلو ترڅنګ دغه ماموریتونه هم وسپارل شي.»
د سیاسي چارو شنونکی شهسوار سنګروال وايي: « واک ته د طالبانو له رسېدو وروسته چې په دیپلوماتیکه ساحه کومه تشه موجوده ده، یو ستر لامل یې دا دی چې نړۍ اسلامي امارت پر رسمیت نه دی پېژندلی او له همدې امله په یو شمېر هېوادونو کې د افغانستان استازولۍ هم شتون نه لري.»
ځېنې نور بیا وايي، سرپرست حکومت دې نه یوازې د افغان کډوالو بلکې له هېوادونو سره دې د اړیکو جوړولو په خاطر هم د سفارتونو بېرته پرانيستلو هڅې وکړي.
دوی زياتوي، روان وضعیت ته په کتو د نړیوالو او افغان چارواکو تر منځ اړیکې نورې هم ترینګلې کیږي او زیان يي عامو افغانانو ته رسېږې.
پخوانی دیپلومات عزیز معارج وايي: « د دغې ستونزې د حل لپاره باید اسلامي امارت په اداره کې اصلاحات راوستي او نړۍ ته قناعت ورکړی وای، ترڅو دغه ستونزه په بنسټیزه توګه حل شوې وه، خو له بده مرغه دغه کار ونه شو. د دغو سفارتونو په تړل کېدو سره بهر مېشتو افغانانو ته ستونزې پیدا شوې دي.»
سرپرست حکومت تر اوسه د هېڅ هېواد له لوري پر رسمیت نه دی پېژندل شوی او يو شمېر هېوادونه همدا موضوع د افغانستان سفارتونو د نه فعالېدو لپاره پلمه کوي.
