د مخابراتو او مالوماتي ټکنالوژۍ وزارت په هغو ۱۶ ولایتونو کې د خلکو د عامه پوهاوي لپاره پرعصري ټکنالوژۍ سمبال مرکزونه پرانیزي، چې نسبتا ً محروم او وروسته پاتې ګڼل کېږي.
د دغه وزارت سرپرست نجیب الله حقاني وايي، په دې برخه کې یې شاوخوا ۳۵ میلیونه افغانۍ پانګونه کړې او هڅې روانې دي، چې لرې پرتو ولایتونو او ولسوالیو ته عصري ټکنالوژي ورسوي.
حقاني وايي:« موږ تقریبا ً د ۳۵ میلیونه افغانیو په ارزښت یوه پروژه پيل کړې، چې له مخې به یې د دایکنډي، غور، بامیانو، پنجشېر، بدخشان، سرپل، بادغیس، نیمروز، اروزګان، زابل، پکتیکا، کاپیسا، کونړ، نورستان او لغمان ولایتونو په ګډون لرې پرتو او محرومو ولایتونو کې ښوونیزو مرکزونو ته سولري برېښنا، مېزونه او څوکۍ او د ولایت نفوس ته په کتو له ۳۰ تر ۵۰ کمپیوټرونه چمتو کړو.»
حقاني دغه راز وایي، هڅه کوي،چې په هېواد کې د ډیجیټلي حکومتولۍ لپاره له وخت وړاندې عامه پوهاوی زیات شي، ترڅو ځوانان له عصري ټکنالوژۍ سره بلدتیا پیدا کړي.
هغه زیاتوي: «موږ د پام وړ لاسته راوړنې لرو. موږ نن د ۱۶ وروسته پاتې ولایتونو رییسان مرکز ته راغوښتي. د مخابراتو وزارت په لویو موخو کې یوه هم ډیجیټل حکومتولي ده. دغه هدف موږ هغه مهال ترلاسه کولی شو، چې ځوانانو ته پوهاوی ورکړل شي.»
د مخابراتو او مالوماتي ټکنالوژۍ وزارت چارواکو په خبره، سرپرست حکومت غواړي په هېواد کې له ټکنالوژۍ او عصري وسایلو سره د ځوانانو د بلدتیا په موخه لا ډېره پانګونه وکړي.
د دغه وزارت مسلکي مرستیال احمد مسعود لطیف وايي: « د ډیجیټلي مهارتونو په هغو کورسونو کې، چې دا مهال په پام کې نیول شوي او په ولایتونو کې تدریس کېږي، د ورډ او ایکسېل په ګډون اداري کمپيوټري پروګرامونه، له کمپيوټر سره آشنايي، د انټرنېټ کارونه او هارډ ویر شامل دي.»
د مخابراتو او مالوماتي ټکنالوژۍ وزارت داسې مهال په ۱۶ لرې پرتو او محرومو ولایتونو کې په عصري ټکنالوژۍ سمبال مرکزونو د جوړیدو خبر ورکوي، چې په لرې پرتو ولسوالیو کې لاهم ګڼ شمېر ځوانان لومړنیو زده کړو ته لاسرسی نه لري.
