شینکۍ د زابل ولایت مرکز کلات ښار څخه ۶۳ کیلومتره لرې پرته ولسوالۍ ده چې زیاته برخه يي په غرونو پوښل شوې ده.
د یادې غرنۍ ولسوالۍ اوسېدونکي وايي، د بېکارۍ له کبله د پراخو اقتصادي ستونزو ترڅنګ تراوسه هم د ژوندانه له لومړنیواسانتیاوو بې برخي دي او له زیاتو ستونزو سره مخ دي.
دوی وايي، تېر او اوسني سرپرست حکومت کومه خاصه پاملرنه نه ده ورته کړې او غوښتنه کوي چې باید د دوی ستونزې حل شي.
د شینکۍ ولسوالۍ یو تن اوسېدونکی محمد شاهی وايي: « کلی یو شی نه لري خواران، ټول نېستمند دي. پخوا په پاکستان کې وو او چې دلته راغلل اوس څه نه لري.»
د شینکۍ ولسوالۍ یو بل اوسېدونکی احمد ولي وايي: « خلک ټول د تکلیف په حالت کې دي، سړک نه لرو، دغه سیند چې را ډک شيؤ دوه اوونۍ هم د موټرو لاره بنده وي او خلک له ستونزو سره مخ وي.»
د شینکۍ ولسوالۍ اوسېدونکی محب الله بیا وايي: « باید چې مرسته راسره وکړي دولت هغه دی پوهېږي، چې باید کلنیک جوړ کړي، پوه ډاکټران راولېږي او دلته ابادي جوړه کړي.»
په ورته وخت د زابل ولایت ځايې مسوولین د شینکۍ ولسوالۍ غرنیو سیمو کې د مېشتو خلکو ستونزې مني، خو وايي، دغې ولسوالۍ کې همدا اوس د یو شمېر رغنیزو پروژوعملي چارې روانې دي چې بیا هم دا بسنه نه کوي.
د مسوولینو په وینا، له یو شمیر موسسو سره په ګډې همغږۍ اوس هم په دې هڅه کې دي چې پر شینکۍ ولسوالۍ سربېره یو شمېر نورو ولسوالیو کې هم د کار پیدا کولو او بېلابېلو پروژ د تطبیق لپاره لار هواره کړي، تر څو په دې سره خلکو ته کاري فرصتونه پیدا او اقتصادي ستونزي يې تر یو حده حل شي.
د زابل ولایت د اقتصاد رئیس مولوي عزت الله وايي: « د شینکۍ ولسوالۍ او داسې نورې سرحدي ولسوالۍ، لکه نوبهار، اتغر او شینوزايي په دې خوا کې دي چې د دوی ستونزې مسلمې دي، موږ یې منو. هو! دوی دا ستونزې لري، مشکلات زیات دي او اقتصادي ستونزې یې هم زیاتې دي؛ نو ان شاءالله موږ دا په پلان کې لرو، چې دې خلکو ته به موږ په ګډه کار کوو، دلته به انکشافي کارونه پیل شي هم به د خلکو ستونزې هوارې شي او هم به ورته کار او روزګار پیدا شي.»
د زابل ولایت شینکۍ ولسوالۍ د غرنیو سیمو یو شمېر اوسېدونکي داسې مهال له بې کارۍ، اقتصادي ستونزو او پیکه عامه خدماتو له نشتوالي شکایت کوي چې د هېواد ځېنو نورو ولایتونو کې هم یو لوی شمېر خلک له ورته اقتصادي ستونزو او کاري بې ثباتۍ سرټکوي .
