په هېواد کې د زړه سرطاني ناروغي هغه ناعلاجه او ځورونکي ناروغي ده چې هرکال شاخوا ۲۰ زره کسان پرې اخته کېږي.
سره له دې چې په کابل کې د دې ناروغۍ لپاره په دولتي او نیمه دولتي روغتونونو کې د تشخیص مجهز مرکزونه پرانېستل شوي؛ خو ډېری ناروغان اوس هم پاکستان ته مراجعه کوي.
کابل کې یوه خصوصي روغتون چې د سرطاني ناروغیو د تشخیص څانګه پرانېستې مراسمو ته یې له ګاونډي هېواد پاکستانه متخصص ډاکټران راوستي دي.
د دغه روغتون مسوولین وایي، موخه یې په دې ناروغۍ اخته کسانو ته امکانات برابرول دي، چې ګاونډیو هېوادونو ته له درملنې راوګرځي.
د روغتون اجرائیوي رئیس عبدالله یوسفزی وايي: « خپله دغه د سرطان ناروغۍ یا د وینې سرطان لپاره د درملنې هڅه کوي او د دردمندو هېوادوالو درد موږ ته دا اغېزه راکړه چې موږ د دې هېواد د کړېدلي ولس دردونو ته درمان شو.»
افغان طبي متخصصین د خصوصي روغتونونو د دا ډول څانګو پرانېستل او ناروغانو لپاره په کور دننه امکانات برابرول په روغتیایي برخه کې غوره اقدام بولي او له دغو پاکستاني ډاکټرانو غواړي چې خپل تجربې او مشورې ورسره شریکې کړي.
د علي اباد روغتون د جراحي څانګې مسوول داکټرعصمت الله وايي: « موږ دغسې سټندرد خدمتونه ستایو. زه له دې ځایه د افغانستان ټولو ډاکټرانو او صحي سکټور ته وایم چې دغسې خدمتونو ته ودرېږئ او تقدیر یې کړئ، مه یې تخریبوئ، تخریب ځای نه لري، ځکه دې هېواد ته سیاسیونو کافي تخریب کړی، طبیبانو، علماوو او پوهانو ته لازمه نه ده چې په خولې یا لاس ولس وځوروي، د دوی قلم، خبرې او هڅې باید د ولس د دردونو درمان شي.»
د طبي تجهیزاتو رئیس مسعود حیدري وايي: « د ټکنالوژۍ له مخې د انکالوژي څانګه داسې یو روغتون دی چې مرحله په مرحله به جوړېږي، ځکه چې مخکې ښاغلي ډاکټر وویل چې ترټولو مهمه مسا له دا ده چې موږ دلته یو ښه انکالوژست ولرو.»
هم مهاله پاکستاني ډاکټران چې کابل ته راغلي د عامو افغانانو ستونزې خپلې ګڼي او وايي، دا یې مسوولیت دی چې د هر ناروغ درملنې او ژوند ژغورلو لپاره خپلې انساني هڅې وکړي.
له پاکستانه کابل ته د راغلیو ډاکټرانو پلاوي غړی متخصص اختر حسین ګیلاني وايي: « د دې لپاره دلته ټول سیسټم موجود دی، دا زموږ د سرطان سېسټم دی، موږ ورته راغلي یو او ان شاءالله دې برخه کې به درملنه کوو.»
په دې غونډه کې د یو شمېر روغتیایي مسوولینو له شخصي روغتونونو غوښتنې دا وې، چې د شخصي روغتونونو مسوولین دې د مسلکي کسانو په ګومارلو تمرکز وکړي.
دا لومړی ځل نه دی چې له پاکستان او خیبرښتونخوا کابل ته د بېلابېلو روغتونونو د ډاکټرانو ډلې راځي او د ناروغانو درملنه کوي؛ خو نیوکې دا دي چې اکثریت راغلي ډاکتران په افغان ناروغانو خپلې د ستاژ دورې بشپړوي.
