د امربالمعروف او نهې عنالمنکر وزارت د شکایتونو د تصنیف او اورېدو رئیس موسی کلیم عاصم د وايي، د اسلامي امارت مشرتابه د شکایتونو اورېدو قانون توشېح کړی.
د عاصم په خبره، دغه قانون یوه سریزه( مقدمه) دوه فصلونه او ۲۳ مادې لري.
عاصم زیاتوي: « دا قانون یوه سریزه (مقدمه) او دوه فصلونه لري او په دوو فصلونو کې ۲۳ مادې لري، چې ځېنې داسې مواد دي چې هغه دوه، درې، څلور او تر پنځو پورې فقرې لري. یاد قانون د هېواد په دوو رسمي ژبو پښتو او دري تصویب شوی دی.»
د امربالمعروف او نهې عن المنکر وزارت د شکایتونو اورېدو مرستیال سیدعلي صدیق الله وايي: « دا قانون د دې لپاره جوړ شوی چې ولسي خلک ښځینه وي که نارینه د حکومت له خلکو او ادارو څخه شکایت وکولی شي. ولسي خلک ښځینه او نارینه، که د دفاع وزارت له کارکوونکو، د کورنیو چارو وزارت، له محکمو، د عدلیې وزارت، والي ، ولسوال او نورو کارکوونکو هر ډول شکایت لري، شکایتونه یې موږ اخلو.»
صدیق الله وايي، د دغه قانون په تطبیق سره به د ټولو هغو بې عدالتیو مخه ونیول شي چې د امارتي ادارو او غړو له لوري له عامو خلکو سره کېږي.
دغه راز صدیق الله وايي، د دغه قانون له مخې ښځې هم کولی شي چې شکایت ثبت کړي او رسېدنه ورته وشي.
د نوموړي په خبره، د تېرکال پرتله د ثبت شویو شکایتونو شمېر راکم شوی دی؛ خو په ثبت شویو شکایتونو کې ډېری د امارت د نظامي غړو پر وړاندې دي.
هغه زیاته کړې:« وړم کال په کابل کې شاوخوا څلور زره شکایتونه او سږکال ۱۷۲۲ شکایتونه ثبت شوې دي؛ نو ولسي خلکو خامخا له نظامي طالبانو شکایت کړی دا سل به سلو کې ثابته ده، البته داسې شکایتونه هم شته چې له محاکمو څخه شوي دي او د دې قانون له مخې به ان شاءالله زموږ، ستاسې او ملت ترمنځ چې څومره فاصله وه دا به له منځه لاړه شي او د مظلوم اوښکې به پاکې شي.»
چارواکي ډاډ ورکوي چې د ولس هرډول شکایت به په شفافه توګه څېړل کېږي او ورسره د شوي ظلم او زیاتي مخه به نیول کېږي.
