د کندهار ښار یو شمېر اوسېدونکي چې د سړک پر سر د کار پیدا کولو لپاره انتظار کوي له بې کارۍ شکایت کوي او وايي، په ژمي کې په ورځو ورځو کار نه ورته پیدا کېږي.
د دوی په خبره د کار د نشتوالي له امله د سختو اقتصادي ستونزو سره مخ دي او نه شي کولی د خپلو کورنیو اړتیاوې پوره کړي.
دوی له حکومت او مرستندویه موسساتو د دوامداره کار غوښتنه کوي.
د کندهار ښار یو تن اوسېدونکی ذبيح الله وايي: « کار نه را پیدا کېږي، په کور کې ماشومان لرو، پلار مې سپین ږیری دی، یوازې زه کار کوم چې دا هم کله وي او کله نه، اقتصاد مو ډېر ضعیف دی، دا دی ۱۱ بجې دي تراوسه موږ ته هېڅ کار نه دی پيدا شوی او له سهار راهیسې دلته ناست یو.»
د کندهار ښار یو بل اوسېدونکی عبدالغني وايي: « د کار ستونزې ډېرې زیاتې دي، کارونه بیخي نشته. هره ورځ راوځو تر ۱۱ او ۱۲ بجو ناست یو او بیا همداسې بېرته کور ته ځو.»
په ورته وخت کې د کندهار د کار او ټولنیزو چارو ریاست مسوولین وايي، هڅه کوي امکاناتو ته په کتو خلکو ته د کار زمینه برابره کړي.
د یاد ریاست د کار امر مولوي محمد یوسف وايي، په کندهار کې د نخي او پشمي کارخونو په فعاله کېدو سره به زیاتو کسانو ته د کار زمینه برابره شي.
هغه زیاتوي: « اوسمهال موږ نږدې ۱۱۲۰ ثبت شوي کسان لرو چې ولایت مقام احکام ورکړي او موږ راجع کړي او عریضې مو ثبت کړي، په دې کسانو کې ۱۰۰ یا ۲۰۰ کسانو ته موږ کار پيدا کړی او دوی په کار بوخت دي، باسواده کسان هم ځینو ریاستونو او ښاروالۍ ته معرفي کوو، همداراز اوسمهال د نساجي فابریکه تر کار لاندې ده او ډېر امید ورته لرو چې زیاتره کسان دلته ثبت او ځای پر ځای کړو.»
څواوونۍ وړاندې د سره صليب نړيوالې کمېټې په خپل یوه راپور کې ویلي و، چې په افغانستان کې بې کاري زياته شوې او ګڼي کورنۍ د خپلو لومړنيو اړتياوو د پوره کولو وس نه لري.
