کابل وړمه ورځ د سیمه ییزې همکارۍ نوښت ترعنوان لاندې د روسیې، چین، ایران او پاکستان په ګډون د ۱۱ هېوادونو د ځانګړو استازو او سفیرانو کوربه وه.
د بهرنیو چارو سرپرست مولوي امیرخان متقي وايي، په دې ناسته کې د ګډو ګټو پر سر خبرې، د احتمالي ګواښو پر وړاندې مبارزه، د سیمې امنیت او هر راز اخلال پر وړاندې پر ګډ دریځ توافق شوی دی.
متقي زیاتوي: « د دې ناستې موخه دا وه چې په سیمه کې یو له بل سره همکاري رامنځته شي او د سیمې په مشترکو ګټو او ګواښونو خبرې وشي. د غونډې ټولو ګډونوالو په اتفاق سره وویل چې په افغانستان کې امن، ثبات او پرمختګ د ټولو پر ګټه دی او د سیمې ناامنه کولو لپاره باید هېڅ ډول قدام ونه شي.»
متقي وايي، په دې ناسته کې د اقتصادي پیاوړتیا په موخه د ټاپي، کاسا زر او ورته پروژو د عملي چارو د پیل پر سر هم خبرې شوي.
متقي دغه راز په کوردننه د ورته ناستو جوړېدل له سیمې سره د سرپرست حکومت د قوي تعامل نښه او د اقتصادي سیاسي او امنیتي پیاوړې همکارۍ لپاره حیاتي مسله بللې.
هغه زیاتوي: « دغه ډول ناستې دا ثابتوي چې د سیمې هېوادونه له افغانستان سره پياوړی تعامل لري، پياوړې راشه درشه غواړي او ټول په دې ټينګار کوي چې له افغانستان سره په سیاسي، اقتصادي او امنیتي برخه کې یو له بل سره همکار یو.»
د بهرنیو چارو سرپرست له نړیوالې ټولنې غواړي چې د سیمې په څېر تعامل ته راوړاندې شي او د فشار له اپشن چې په وینا یې په تېرو دوه نیمو کلونو کې یې ګټه نه ده کړې؛ ډډه وکړي.
هغه زیاته کړې: « پر ټولو نړیوالو غږ کوو چې لرې پراته هېوادونه هم له افغانستان سره مثبت تعامل ته راوړاندې شي. د فشار هغه ناکامه، سولېدلې او تجربه شوې لارې دې نورې نه کاروي او د افغانستان ثبات، امنیت، پرمختګ او ښه اقتصاد د ټولې نړۍ پر ګټه دی.»
دا په داسې حال کې ده چې په تېرو نږدې دوه نیمو کلونو کې د افغانستان د قضیې پر محوریت په سیمه ییزه او نړۍواله کچه ګڼې ناستې ترسره شوي چې ډېری د سرپرست حکومت له ګډوڼ پرته؛ خو یو شمېر نورو کې بیا د اسلامي امارت استازي هم ګډوڼ کړی؛ خو هغه څه چې روښانه دي دا دي چې تر اوسه یې محسوسې پایلې نه دي لرلي.
