هېواد کی د روانو حالاتو په تړاو د کابل په شمول يو شمېر هېوادونو کی غونډې وشوې؛ خو عام باور دا دی چې یادو غونډو د افغانستان په روانو ستونزو هېڅ مثبت اغېز نه درلوده.
چین کې د افغانستان سفیر مولوي اسدالله بلال کریمي ویلي، را روانه دوشنبه د سیمې یو شمېرهېوادونو په شمول د افغانستان روانو حالاتو په تړاوغونډه جوړوي.
کریمي ویلي، د روسیې، چین، ایران او پاکستان په شمول یاده غونډه د سیمهيیز ابتکار تر نامه لاندې جوړېږي، چې کوربهتوب به یې کابل وکړي.
بلال کریمي دغه خبرې چین کی د یاد هېواد د بهرنیو چارو وزارت د اسیایي چارو له مرستیال سره په لېدنه کی کړې دي.
د سیاسي چارو شنونکي بیا وايي، د افغانستان اړوند زیاترو هېوادونو کې غونډې وشوې؛ خو کومه مثبته پایله یې نه درلوده.
دوی وايي، وېره دا ده چې ورته غونډو کې نړیوال خپلې سیاسي موخې څاري او د افغانستان لپاره ښه نیت نه لري.
د سیاسي چارو شنونکی شهسوار سنګروال وايي: « د افغانستان په تړاو په بېلابېلو وختونو کې یو شېمرغونډې ترسره شوې دي؛ خو دغه غونډې تر ډېره بریده دوه مخې لوبه ښي، دا په دې معنی چې هېڅ چا هم عملي ګام پورته نه کړ او له دې داسې مالومېږي چې دغه غونډې خپلې موخې لري او هر څوک یې د خپلو سیاسي ستونزو د حل لپاره ترسره کوي.»
یو شمېر نور بیا وایي، هره هغه غونډه چې د افغانستان په تړاو ترسره کېږي د هېواد پر ګټه ده او اسلامي مارت باید دغه ډول چانسونه له لاسه ورنه کړي او ښه ګټه ترې پورته کړي.
د دوی په خبره، دا ډول غونډې کولی شي چې د نړۍ او افغانستان ترمنځ شته ستونزې هوارې کړي او په دې توګه د نړیوالو باور پر اسلامي امارت زیات شي.
د پوهنتون استاد فیض محمد ځلاند وایي: « د افغانستان په تړاو هره غونډه چې هر ځای ترسره کېږي ډېره مهمه ده، دا چې په کابل کې په لومړي ځل د اسلامي امارت په کوربهتوب د سیمې هېوادونو د ځانګړو استازو په ګډون غونډه ترسره کېږي، لومړی ارزښت یې د موقعیت او جغرافیې له مخې دی، دویم ارزښت یې دا دی چې له دې لارې به موږ د سیمې له هېوادونو سره همغږي او همکاري رامنځته کړو او د افغانستان اوسنۍ کشالې ته به یوه ګډه د حل لار پيدا کړو.»
د سیاسي چارو شنونکی عزیز معارج وايي: « په کابل کې د تماس ډلې غړیو هېوادونو ترمنځ د غونډې ترسره کول خپل ځانګړی ارزښت او اهمیت لري، ځکه دا د افغانانو په نوښت او کوربهتوب جوړېږي او دا چې په اوسنیو حالاتو کې افغانستان نږدې له نړیوالې انزوا سره مخ دی او اقتصادي ستونزې لري؛ نو په دې برخه کې د کابل غونډه اړین رول لوبولی شي او د همدې له مخې به د دوحې غونډه هم ترسره شي.»
په ورته وخت کی د ایران د بهرنیو چارو وزارت پر خپله اېکس پاڼه د دغې غونډې پخلی کړی او یاده غونډه یې د افغانستان او سیمې هېوادونو پر ګټه بللې ده.
شنونکي وايي، ورته غونډې به د قطر په راتلونکې غونډه ښې اغېزې ولري او هېواد به تر ډېره له اقتصادي او سیاسي ستونزو وباسي.
دوی وایي، د سرپرست حکومت مسوولین دې له دغې غونډې د هېواد پر ګټه استفاده وکړي.
هڅه مو وکړه په دې اړه د اسلامي امارت د مسوولینو نظر واخلو خو له پرله پسې هڅو سره سره بیا هم هغوی حاضر نه شول چې د یادې غونډې په اړه موږ ته مالومات راکړي.
