د روسیې بهرنیو چارو وزیر سرګي لاوروف ویلي، کابل ته یې سپارښتنه کړې څو د رسمیت پېژندنې لپاره باید نورو پرګنو ته هم په حکومت کې ونډه ورکړي.
لاوروف د افغانستان په تړاو خپلو څرګندونو کې په ډاګه کړې چې اړینه ده اسلامي امارت په حکومت کې سیاسي ګوندونو ته هم ونډه ورکړي او دغه کار کولی شي افغانستان د نظام له نړیوالې رسمیت پېژندنې سره مرسته وکړي.
خو د اسلامي امارت ویاند ذبیح الله مجاهد بیا دغه ډول څرګندونې د افغانستان په کورنیو چارو کې لاسوهنه ګڼي.
مجاهد شمشاد ته وویل، د نظام او حکومت څرنګوالی او په کې نورو ته د ونډې ورکړه د افغانانو کار دی او په دې تړاو به پرېکړې د ملي ګټو پر اساس کیږي.
د مجاهد په خبره، اوسنی حکومت ټولګډونه دی او د ټولو قومونو استازي په کې برخه لري.
هغه زیاتوي: « د افغانستان اسلامي امارت د روسیې په ګډون له ټولو سیمهییزو هېوادونو سره ښې اړیکې لري او غواړي دا اړیکې پياوړې او د باور وړ شي. همداراز له نورو هېوادونو غواړو چې د افغانستان په کورنیو موضوعاتو کې هېڅ ډول لاسوهنه ونه کړي. په افغانستان کې د حکومت څرنګوالی، شمولیت او نه شمولیت دا د نورو هېوادونو دنده نه ده، د افغانستان د خلکو دنده ده او څه چې د افغانستان ملي ګټو ایجابوي؛ هماغه تصمیم دلته نیول کېږي. اوس هم حکومت ټولګډونه دی، ټولې پرګنې په کې دي او د افغانستان د خلکو استازیتوب کوي. له روسیې موغوښتنه دا ده چې د یوه هېواد په توګه له افغانستان سره تعامل ولري.»
د سیاسي چارو کارپوهان وايي، د حکومت د څرنګوالي په تړاو بهرنۍ نسخې پایله نه ورکوي او نه هم هغه ډول حکومتونه چې د بهرنیانو په خوښه د سهامي شرکتونو په شکل کې رامنځ ته شي.
دوی وايي، لا هم په افغانستان کې داسې سیاسي څېرې حضور لري چې ملي ګټو ته ژمنې دي او باید د حکومتولۍ په برخه کې ترې ګټه واخېستل شي.
د سیاسي چارو کارپوه شهزاده مسعود وايي: « په افغانستان کې هېڅکله پردۍ نسخې نتیجه نه ده ورکړې. له نېکه مرغه چې موږ د افغانستان دننه په ملکي او نظامي برخو کې بهترین کادرونه لرو، بهترین وطن دوسته سیاسي شخصیتونه لرو او دا د حکومت دنده ده چې دوی جذب کړي او په ورته وخت کې اساسي قانون جوړ شي او دلته قانومندي راشي، نو نور به د پردیو لاسوهنو ته هم پلمه نه وي، د سهامي شرکت قدرتونه او یا د قدرت د وېش خبره ناکامې تجربې دي، د افغانستان درد نه دوا کوي او افغانانو ته هم د منلو وړ نه دي.»
ځینې نور بیا وايي، اسلامي امارت باید هغو سیاسي ګوندونو ته د فعالیت اجازه ورکړي چې ریښتیني دي او د هېواد پرمختګ او ثبات لپاره ژمن دي.
دوی وايي، غوښتنه یې دا ده چې سرپرست حکومت باید د احزابو پر قانون له سره غور وکړي.
د سیاسي چارو کارپوه نجیب الرحمان شمال وايي: « د افغانستان خلکو ملي او اسلامي ارزښتونو په چوکاټ کې د سیاسي ګوندونو د فعالیت قانون په بیا ځلې توشیح سره دې، هغو ګوندونو ته چې قانون ته ژمن دي او د هېواد ابادي، پرمختګ او پراختیا غواړي د فعالیت اجازه ورکړل شي او دوی دې نه محدودوي، ځکه دوی کولی شي د خپلو غړیو په معرفي کولو سره حکومت جوړونه کې ونډه واخلي او حکومت ته مثبت اواغېزناک تمام شي.»
دا لومړی ځل دی چې روسیه د افغانستان په اوسني نظام کې د پخوانیو سیاسي ګوندونو د ونډې غوښتنه او وړاندیز کوي.
کتوونکي په دې باور دي چې ډېری پخوانیو سیاسي ګوندونو افغان ولس ته ازموینه ورکړې او نور د باور وړ نه دي؛ خو په کار ده چې په دغه برخه کې شته تشه له قانوني لارو ډکه شي او پر حکومت د سالمو نیوکو لپاره د سیاسي ادرس پر جوړښت هم فکر وشي.
