زابل هم د هېواد یو له هغو ولایتونو څخه دی چي په کې ولسوالیو ته د ورغځېدلو لارو د خرابوالي له امله يې د خلکو شکایتونه ورځ تر بلې ډېرېږي.
د دې ولایت په شمال کې د میزاني، ارغنداب او دایچوپان ولسوالیو اوسېدونکي وايي، سیمو ته غځیدلي ټولې لارې کنډ او کپر دي او په ژمني موسم کې خو د واورو او بارانونو له امله تر دې هم خرابېږي او دوی ورسره له زیاتو ستونزو سره مخ وي.
دوی له دولت او مرستندویه بنسټونو غواړي چې ولسوالیو ته غځېدلې لارې يې ورته ورغول شي.
د میزاني ولسوالۍ یو تن اوسېدونکی عبدالحنان وايي: « زموږ ولسوالۍ سراسر خطر کې دي، ځکه مریضان مو تر دې ځایه نه شي رارسېدلی. هلته کلېنیکونه نه لرو، لارې په بشپړ ډول خرابې دي.»
د ارغنداب ولسوالۍ یو تن اوسېدونکی رحمتالله وايي: « باید ورځ تر بلې دا لارې جوړې شي، هوارې شي. لارې دومره خرابې دي چې یو ځل مو موټر له اختیاره ووت نو بیا له سخت ګواښ سره مخ کېږو.»
د دایچوپان ولسوالۍ یو تن اوسېدونکی حبیب الله وايي: « په دا ژمي کې بازار ته د مریضاتو وروستل ډېر سخت دي، کوچني موټر په دې لارو تللی نه شی، غټ موټر نشته؛ نو ستونزې بیخي زیاتې دي.»
بل خوا بیا د زابل ځايې مسوولین د خلکو دغه ستونزې مني، خو وايي، د امکان تر حده به د شته امکاناتو پر مټ دغه لارې ورغوي.
د زابل د ټولګتو چارو ریاست مشر مولوی احمد احمد وايي: « موږ الحمدالله د دې لپاره خپل وسایل لرو او خپلو ستونزو ته په کتو به تر خپلې وسې ان شاءالله کار کوو، داسې ستونزه دې خدای نه پېښوي چې زموږ تر وس وتلې وي. ټولې لارې مو په پام کې نیولې او پلان ورته لرو، چې کار پرې پيل کړو.»
د زابل ولایت د شمالي ولسوالیو اوسېدونکي داسي مهال د لارو له خرابوالي شکایت لري چي د هېواد په یو شمېر نورو ولایتونو کې هم د عمومي لویو لارو ترڅنګ ولسوالیو او لرې پرتو سیمو ته له ورغځېدلو لارو څخه خلک شکایت لري؛ خو ډېری وخت يې مسوولین د جوړېدو ډاډ ورکوي.
