د ارزګان ولايت د عامې روغتیا ریاست له خوا هغه کمېټه چې په مرکز ترینکوټ او ولسوالیو کې د بې کیفته او د تاریخ تېرو در ملو د راټولو دنده پر غاړه لري، یو ځل بیا یې د تاریخ تېرو او بې کیفیته درملو را ټولو لړۍ پیل کړه.
د یاد ولایت عامې روغتیا ریاست مسوولین وایي، په ښار کي یې یو شمېر شکمن درملتونه مخکې له مخکې لاک او مهر کړي ول چې نن د رسنیو او یو شمېر موظفو ادارو په مخ کي خلاص او وکتل شول.
د یاد ریاست د درملتونونو د څارنې کمېټې مسوول سردار محمد حقیار وايي، د پلټنو پر مهال په یادو درملتونو کي تاریخ تېر او بې کیفته درمل تر لاسه شوي دي.
د حقیار په خبره، هغه کسان چې د ياد کمپاين له ترسره کيدو وروسته بي کفيته او تاریخ تيري درمل په خپل درملتونونو کې وساتي کار ځايونه به يې ورته وتړي.
حقیار زیاتوي: « موږ د ښار اکثر درملتونونه وتړل، تر څو له ښاره بې کیفیته او تاریخ تېره درمل راټول کړو. موږ د عامې روغتیا وزارت له لوري څلور ټيمونه جوړ کړي او د ښار بېلابېلو درملتونونو کې عملا د کار څارنه روانه ده او تاریخ تېره درمل راټولوي. شکایتونه زیات وو او د همدې شکایتونو له مخې په دې کال کې دا درېبم ځل دی چې موږ د ښار درملتونونه څارو او تاریخ تېر درمل راټولو.»
د اروزګان اوسېدونکي د عامې روغتیا ریاست له دي اقدام خوښ دي او غوښتنه کوي چې دا لړۍ دې تر لرو پرتو سیمو هم وغځول شي.
دوی وايي، په ښار کې د بي کفيته او تاریخ تيرو درملو له شتون څخه سخت په تنګ شوي او ډېری وخت د درملتونونو له لوري ورباندې تاریخ تېره او بې کفيته درمل پلورل کيږي.
دغه راز دوی وايي، له مسوولينو غواړي چې هغو کسانو ته دې سخته سزا ورکړي چې تاریخ تيره او بي کفيته درمل پلوري.
د اروزګان یو تن اوسېدونکی حمدالله وايي: « دا ډېر ښه پرګرام دی او باید ترسره شي او تاریخ تېره درمل ټول شي، ځکه دا د مسلمانانو لپاره لوی ګواښ دی.»
د اروزګان یو بل اوسېدونکی شمس الله وايي: « ما درمل اخېستل تاریخ تېره درمل یې راکړل، ورور ته مې ښکاره کړل ویل یې تاریخ یې تېر دی او بیا یې درملتون ته ور وړل ورته یې وویل انسانان پرې وژنې؟ نو زموږغوښتنه دا ده چې د تاریخ تېره درملو پلور ته اجازه ورنه کړي»
شاوخوا درې میاشتې وړاندې هم د عامې روغتیا ریاست د ګډې کمېټې له لوري په ښار کي د شفري نسخو او د تاریخ تیره او بې کیفته درملو د سمون په موخه دا ډول ګامونه اخېستل شوي وه.
