د سپټمبر ۲۹ مه د زړه له نړیوالې ورځې سره برابره ده خو په کابل کې په دوه ورځني ځنډ سره «د زړه په اړه د زړه له کومې پوه شئ» تر شعار لاندې د عامي روغتیا وزارت او روغتیا نړیوال سازمان له لوري ونمانځل شوه.
د روغتیا نړیوال سازمان موندنې ښيي، په افغانستان کې د لوږې او فقر له امله د غیرې سارې ناروغیو د اخته کسانو مړ کېدو کچه ۵۰ سلنه لوړه شوې او پر دې ناروغیو د اخته کېدونکو کسانو شمېر به تر ۲۰۳۰ کال پورې څو برابره زیات شي.
د يادو موندنو پر بنسټ که د غير ساري ناروغيو مخنیوی ونه شي، نو د دې امکان شته چې له امله يې د مړينې کچه ۷۰ سلنه زياته شي.
د روغتیا نړیوال سازمان استازی ډاکټر دل آرا منوال وايي:« خوشحاله یم، چې نن په افغانستان کې دغه ورځ نمانځو، خو په افغانستان کې د غېر ساري نارغيو له امله ۵۰ سلنه مړينه زياته شوې. دغه ساري ناروغیو کچه به تر ۲۰۳۰ پورې په چټکې سره پرمختګ وکړي او که چېرې یې مخنیوی پر وخت سره ونه شي، نو د مړينې کچه به له ۷۰ سلنې هم زیاته شي او د افغانستان ۴۸ میلیونه نفوس په منځ کې به ۶۰ سلنه ښځې له دې ناروغيو ومري.»
د عامي روغتیا وزارت مسوولین وايي، په پام کې ده چې د زړه ناروغانو د درملنې لپاره په کابل کې ځانګړې څانګه پرانېزي چې بشپړه درملنه به یې په کور دننه وشي.
په ورته وخت کې ډاکټران بې وزلي، سګرټ څکول، سالمي تغذیه ته نه پاملرنه، په زياته اندازه د غوړيو کارول، مالګې زیاته استفاده او غیر سارې ناروغیو په تړاو د کمپاینونو نشتون د غیر سارې ناروغیو زیاتوالي عمده لاملونه بولي.
دوی ټينګار کوي چې باید له پاکو اوبو او سبزیجاتو په زياتې استفادې سره له يادو ناروغيو ځان وژغورل شي.
ډاکټر عبدالواحد صدیقي وايي:« هغه حل لارې چې زه یې وړاندیز کوم لومړی دا چې د ورکشاپونو، کنفرانسونو او تر ټولو ښه ځای جومات دی چې له دې لارو د خلکو عامه پوهاوی زیات شي، په جوماتونو کې دې ملایانو ته چې علمان دي دغه ټول مسایل وویل شي او له دې لارې دې تر خلکو ورسول شي، داسې به په لنډه موده کې ښه پایله ترلاسه شي. دویم دا چې خصوصي سکټورونو ته د اسانتیاوو په رامنځته کولو سره په افغانستان کې د تخصصي روغتونو زمینه په ډېرو ښه امکاناتو برابرولی شو. زه هېله لرم چې د عامې روغتیا وزارت وکولی شي د زړه جراحي عملیاتونه ترسره کړي، د زړه د جراحي عملیاتو د یوه ناورغ لګښت ۱۵۰۰ ډالره کېږي.»
د عامي روغتیا وزارت دغه راز د قلبي ناروغیو د مخنیوي په خاطر د روغتیا له نړیوال سازمان څخه غوښتنه کوي، چې روغتیا دې له سیاست سره نه تړي بلکې له سیاست پرته دې له دوی سره مرستې زیاتې کړي.
