د پکتیا ولایت څمکنیو ولسوالۍ په شهرنو بازار کې چې د دې ولایت په کچه تجارتي مرکز بلل کیږي، لا هم خلک د افغانیو پر ځای پر پاکستانیو کلدارو پير او پلور کوي.
عام خلک او هټۍ وال وايي، دوی د افغانیو د ترویج په برخه کې له حکومت سره همکارۍ ته چمتو دي، خو په خبره يې دولت ته هم پکار ده، چې په دې تړاو اړین ګامونه پورته کړي.
د څکمنیو ولسوالۍ یو تن اوسېدونکی وايي:«موږ په دې خوشاله کېږو چې زموږ خپل هېواد دی او خپلې افغانۍ وکاروو.»
د څکمنیو ولسوالۍ یو بل اوسېدونکی بیا واي:« موږ باید د پردېو له پیسو لاس واخلو ترڅو هغه ستونزې چې د دې پردېو پیسو له امله راغلي هغه حل شي.»
د څمکنیو ولسوالۍ یو تن اوسېدونکی:« خلک په افغانیو او ډالرو توکي راوړي په ډالرو یې خرڅوي، همدارنګه د مزدورانو او ټولو خلکو ډېرې ستونزې دي، نو دولته دا هېله لرو چې موږ ته دلته کرنسي په افغانیو کړي.»
اخوا صرافان او سوداګر وايي، که په ياده ولسوالۍ کې د بانک څانګه پرانېستل شي او یا هم سرپرست حکومت افغانۍ په بازارونو کې ډېرې کړي، د افغانیو د ترویج یاده ستونزه ورسره حل کیدلی شي.
څمکنیو ولسوالۍ کې د صرافانو ټولنې مشر محمد ایوب وايي:« دا حکومت پورې تړلې خبره ده حکومت مخکې هم دا هڅه کړې، خو که خلک ملاتړي نه شي ورسره حکومت نه شي کولی دغه پیسې بندي کړي.»
د څمکنیو ولسوالۍ یو تن هټۍ وال سید سلېمان وايي:« دلته د افغانیو کمښت دی له خلکو سره او بانکي سیستم دلته شتون نه لري، نو زموږ له دولته دا هېله ده چې موږ ته بانکي سیستم فعاله کړي ترڅو ولس له افغانیو برخمن شي او زموږ راکړه ورکړه ټوله پر افغانیو شي.»
سوداګر زاهد زغم بیا وايي:« علت خو واضح خبره ده یو څه حکومت همکاري نه کوي او یو څه هټۍ وال په اتفاق نه دي، دواړه طرفونه همکارۍ نه کوي او بل زه فکر کوم حکومت هغومره په کافي اندازه افغانۍ هم شهرنو بازار ته نه شي رسولی.»
د پکتیا ځايي چارواکي هم مني چې دغلته لا هم په ځينو ولسوالیو کې پير او پلور پر کلدارو کېږي، خو زياتوي هڅې یې پیل کړي ترڅو په دې ولایت کې پر بهرنیو اسعارو د پير او پلور مخنیوی وکړي.
د پکتیا اطلاعاتو کلتور ریاست مشر ثواب جان اسلامیار وايي:« په پکتیا کې به ډېرې کمې ولسوالۍ او ځایونه وي چې هلته دې په بازارونو کې راکړه ورکړه په کلدراو کېږي. د افغانستان د اسلامي امارت د مشرانو پالېسي، هوډ او اراده دا ده چې په جدي توګه د کلدارو راکړې ورکړې مخنیوی وشي او ۱۰۰ سلنه په هېواد کې افغانۍ رایج شي.»
د پکتیا ترڅنګ د پکتیکا په ډېریو ولسوالیو کې هم خلک په ورځینو راکړو ورکړو کې له پاکستانیو کلدارو ګټه اخلي.
د چارواکو په خبره، په دې تړاو یې خپلې هڅې ډېرې کړې دي ترڅو په دې برخه کې د افغانستان بانک په مرسته یاده ستونزه په بشپړه توګه حل کړي.
