له اوږده ځنډ وروسته د امریکا بهرنیو چارو وزارت له افغانستانه د دې هېواد د ځواکونو اېستلو په تړاو یو ځل بیا راپور خپور کړی دی چې په کې پرمخکېني ولسمشر ډونالډ ټرمپ او اوسني ولسمشر جو بایډن دواړو سختې نیوکې شوي دي.
راپور چې د امریکا د بهرنیو چار وزارت د ۱۵۰ اوسنیو او پخوانیو کارماندانو سره د مرکو په لړ کې چمتوو شوی، په کې ویل شوي چې د ټرمپ او بایډن پرېکړو مخکيني افغان حکومت او امنیت ته جدي او سختې پایلې لرلې.
د راپور یوه برخه:« افغانستان کې د امریکا پوځي ماموریت د پای ته رسولو په اړه د دواړو ولسمشرانو ډونالډ ټرمپ او جو بایډن پرېکړو د مخکيني افغان حکومت او د افغانستان امنیت لپاره جدي پایلې لرلې.»
په راپور کې ويل شوي، که څه هم بهرنيو چارو وزارت د ولسمشرانو پریکړې نه دي ارزولې، خو دا یې موندلي چې د هېڅ یوه اداره دې ته نه وه چمتوو چې څه پښیږي؟
د راپور یوه برخه:« که څه هم هغه پرېکړې د دې بیاکتنې برخه نه دي. خو له عمل وروسته د بیاکتنې ډلې وموندله چې د دواړو ادارو پر مهال پر لوړه کچه د تر ټولو بدو سناریوګانو او په ډېرې چټکۍ د هغو د پېښېدو په اړه چمتووالی نه وه.»
ورته مهال دغه راپور کې راغلي چې په دوحې کې د امريکا او د افغانستان اوسني حکومت ترمنځ د تړون له لاسلیک سره هم مهاله افغانانو ته د وېزو ویش برخه کې خنډونه موجود وو.
راپور کې ویل شوي چې امریکایي چارواکو دې ته هیڅ پلان نه درلود، چې څومره افغانان بهر وباسي او دا پروسه به څومره وخت نیسي؟
د راپور یوه برخه:« هغه مهال کله چې د ټرمپ ادارې د ۲۰۲۰ کال فبرورۍ میاشت کې له طالبانو سره تړون لاسلیک کړ، د افغانانو لپاره د کډوالۍ ځانګړو ویزو پروسه کې د پام وړ ستونزو شتون درلود. په هېڅ لوړه کچه پر دې غور نه و شوی، چې څومره افغانان له ګواښ سره مخ دي؟ چا ته اولویت ورکړي؟ او اېستل یې څومره وخت نیسي؟ چې د دفاع او بهرنیو چارو وزارتونه یې له سختونو ننګونو سره مخ کړل.»
د امریکا بهرنیو چارو وزارت دا هم ویلي د ټرمپ لخوا له افغانستانه د خپلو ځواکونو پریکړې د بایډن اداره له داسې پوښتنو سره بې ځوابه پریښوده چې امریکا څنګه د ۲۰۲۱ کال تر مې میاشت پورې په بشپړه توګه ځواکونه وباسي، امریکا څنګه کولی شي له وتلو وروسته په کابل کې ډیپلوماتیک شتون ولري او له خطر سره مخ افغانانو سره څنګه مرسته وکړي.
