مجاهد یو ځل بیا افغانستان کې د هرراز ترهګرو ډلو شتون په کلکه ردوي او ډاډ ورکوي،چې هېڅ وسله والې ډلې ته به موقع ورنه کړل شي، چې د افغانستان له خاورې د ګاونډیو، سیمې او نړۍ امنیت ته ګواښ پېښ کړي.
مجاهد زیاته کړې:« په دې اړه که بهرني هېوادونه له لویو سیالو هېوادونو سره هغه سیاسي مخالفت ښکاره کوي او بیا د افغانستان له خاورې استفاده کول غواړي، یا په سیاسي لحاظ افغانستان ناامنه ښودل غواړي، دوی باید دا کار ونه کړي. افغانستان امن دی. افغانستان کې ثبات شتون لري، د هېڅ هېواد لپاره ګواښ نه شته دی او افغانستان د هېڅ هېواد پر ضد نه کارول کېږي. د افغانستان اسلامي امارت ستراتیژي دا ده،چې د افغانستان امنیت او ثبات وساتل شي او هېڅ خپلسري شخص او ډلې ته اجازه نه ورکوي،چې د افغانستان خاوره د چا پر ضد وکاروي.»
دوی زیاتوي، که له روسیې سره په رېښتیا هم سیمې ته د ترهګریزو ګواښونو په اړه وېره او یا هم شواهد وي، موضوع باید د ملګرو ملتونو له لارې له امریکا سره مطرح کړي، که نه نو روسیه دې له هغو بې مسوولیته او له واقعییته لرې څرګندونو لاس واخلي،چې د نړیوالو په اذهانو کې د افغانستان په تړاو بد انځور جوړ کړي.
