اوچا: افغانستان کې هره ورځ دوه ماشومان د ناچاوده توکو له امله قرباني کېږي

د ملګرو ملتونو د بشري مرستو همغږۍ دفتر (اوچا) ویلي، چې په تېر ۲۰۲۲ کال کې څه باندې ۷۰۰ افغان ماشومان د ناوچاده او پوځي توکو له امله مړه او ټپيان شوي.

اوچا زیاته کړې:«  په ۲۰۲۲زیږدیز کال کې په افغانستان کې د ناچاوده توکو له امله  څه باندې ۷۰۰ ماشومانو ته مرګ ژوبله اوښتې. دغه شمېر په ورځني ‌ډول د دوه ماشومانو مرګ ژوبله ښايي.»

په ورته وخت کې د ملګرو ملتونو عمومي منشي مرستیاله جو.ایس.ايم سویا وايي، افغانستان کې لا هم خلک د جګړو بیه پرې کوي او ورځینی ژوند یې ورته ستونزمن کړی دی.

هغې زیاته کړې:« لا هم د افغانستان په ګډون د نړۍ په ګڼو هېوادونو کې د جګړې لویه بیه ملکي خلک پرې کوي. میلیونونه خلک هر کال بې کوره کیږي او میلیونونه نور د څښلو پاکو اوبو سرچینې له لاسه ورکوي. د ملکي خلکو کورونه او روغتونونه ورانیږي او جنسي تاوتریخوالی هم زیاتیږي.»

د ماین پاکۍ برخې کارکوونکي وايي،افغانستان کې زرګونه انسانان د ناوچاده توکو قرباني شوي دي،چې دېر شمېر یې ماشومان دي.

د اومر ماین پاکۍ موسسې مسوولین بیا ډاډ ورکوي،چې افغانستان کې لاهم ۱۵۰۰ کیلومیټره ناپاکه سیمې شته او د خطر وړ توکو څخه پاکۍ ته اړتیا لري.

دوی زیاتوي، تمه دا وه،چې روان کال د افغانستان ډېری سیمې له ناوچاده توکو پاکې کړي،خو د ځینو ستونزو له امله نه دي توانېدلی چې بریالي شي.

په تېرو څو لسیزو جګړو د افغانستان ډېری سیمو کې  د ناوچاده توکو شتون د خلکو ژوند ګواښلی او د مالوماتو له مخې،چې په لوړه کچه قرباني یې ماشومان دي.