د نورو هېوادونو پر ضد د افغانستان خاورې د نه کارېدلو په اړه د اسلامي امارت پرلپسې ډاډ وروسته هم امریکا وایي، له دغه هېواد دوی او نورو هېوادونو ته ګواښ پېښیدلی شي.
د امریکا مرکزي قوماندانۍ مشر جنرال ایریک کوریلا تازه د کانګرس یوې پوځې کمیټې استماعیه ناسته کې افغانستان کې د داعش شتون په اړه اندېښنه ښودلې او ویلي یې دي چې امریکا ته هم ګواښ پېښولی شي.
هغه زیاته کړې:«داعش په افغانستان کې هڅه کوي،چې خپل شتون لا پیاوړی کړي، ترڅو له افغانستانه بهر او پر امریکا بریدونه وکړي.»
جنرال کوریلا افغانستان کې د داعش وسله والو شمېر څه باندې ۲ نیم زره یاد کړی او زیاته یې کړې یې ده،چې افغان حکومت یې پر وړاندې مبارزه کوي،خو کافي نظامي او استخباراتي ځواک نه لري.
هغه زیاتوي:«افغانستان کې د داعش ډلې شمېر ۲۵۰۰ ته رسېږي،چې دا شمېر یوازې د افغانستان لپاره دی. د الصدیق په نوم داعش ته یوه بله منصوبه ډله هم له افغانستان بهر د سیمې لپاره فعالیت کوي. د دوی شمېر مهم نه دی،مهم دادي،چې دوی وړتیا لري له افغانستانه بهر د نورو سیمو پر وړاندې پلانونه جوړ کړي. موږ پوهېږو،چې طالبان د داعش پر وړاندې مبارزه کوي،خو دوی کافي استخباراتي ځواک نه لري،چې د هغو ګواښونو پر وړاندې مبارزه وکړي، چې موږ یې په اړه خبرې کوو.»
د اسلامي امارت ویاند ذبیح الله مجاهد د دې امریکایي جنرال څرګندون ته کلک غبرګون ښودلی او ویلي دي،چې امریکا په قصدي ډول داعش ډله ګواښوونکې او لویه معرفي کوي.
مجاهد زیاته کړې:«په افغانستان کې د داعش ډلې د تعداد په اړه د امریکایي چارواکو څرګندونې حقیقت نه لري. داعش له پخوا څخه په مراتبو کم شوي او ځپل شوي دي. د امریکایي چارواکو لخوا له دې موضوع سره دلچسپي او د هغوی لویه ښوونه پخپله له داعش سره مرسته او هغوی ته کمپاین دی،چې باید ودرول شي.»
بل خوا د بهرنیو چارو سرپرست وزیر مولوي امیرخان متقي په یوه مقاله کې یوځل بیا د ډاډ په توګه ویلي،چې نظامي ځواک یې پياوړی دی او چاته به اجازه ورنه کړي،چې خاروه یې د نورو پر ضد وکاروي.
متقي زیاته کړې:« موږ په خپل وار د ډاډمن امنيت او سياسي ارادې له پلوه له هر هېواد سره د ګډو منافعو پر بنسټ شراکت ته چمتو يو. اسلامي امارت په دغه موده کې امنیتي ځواکونه منظم او سرتاسري امنیت یې ټینګ کړ او هېچا ته یې فرصت نه دی ورکړی،چې د افغانستان خاوره د نورو پر ضد وکاروي.»
د سیاسي چارو یو شمېر کارپوهان په دې اند دي،چې داعش په افغانستان کې په دومره کچه شتون نه لري، څومره ترې سیمه او نړۍ اندېښنې څرګندوي.
له دې وړاندې د افغانستان ګاونډیو هېوادونو هم افغانستان کې داعش ډلې شتون ته اندېښنې څرګندې کړې وې او ویلي ول،چې دا ډله د سیمې ثبات ننګولی شي.
