د پکتیا ولایت مرکز ګردیز کې د ښاروالۍ له لوري د ارجال خېلو او خواجه حسن سړکونه د ۲۴ میلیونه افغانیو په لګښت جوړ شوي دي .
د اسلامي امارت ویاند ذبیح الله مجاهد چې د یادو سړکو پرانېستې په اړه جوړو شویو مراسمو کې یې ګډون کړی وایي، اسلامي امارت د بانکي محدودیتونو او بودیجې کموالي سره سره هېواد کې د ګڼو لویو پروژو د چارو پیلیدو هوډ لري.
مجاهد زیاته کړه:«نورې ډېرې پروژې،چې کار به پرې پیل شي، سره له دې چې نړیوال مو نه پرېږدي، بانکي برخه یې راته ستونزې جوړې کړي او دغه راز د پانګې جلب په برخه کې یې راته ستونزې جوړې کړي.»
مجاهد همدا راز وایي، اسلامي امارت تیر یوه کال کې توانیدلی،چې د کابل ـ کندهار او سالنګو تر څنګ د ځېنې نورو سترو پروژو کارونه پیل کړي او دا چاره به دوام ولري.
هغه زیاته کړه:« په عموم کې اسلامي امارت په تېر یوه کال کې د ابادۍ لپاره ډېرې هڅې کړي دي. د بېلګې په ډول همدا اوس د کندهار- کابل پر لویه لاره کار روان دی،چې په معیاري ډول به جوړه شي.»
له دې سره مجاهد وايي، اسلامي امارت په پام کې لري،چې د مچلغو بند تر څنګ پکتیا کې د ګڼو نورو هغو پروژو چارې بېرته پیل کړي،چې کارونه یې د اسلامي امارت له واکمنیدو راهیسې ځنډیدلي دي.
