په پکتیا ولایت کې یو شمیر بزګران شکایت کوي،چې د کرنې او مالدارۍ ریاست او مرستندویه بنسټونه ورته اصلاح شوي تخمونه پر وخت نه ویشي.
بزګران وايي،سږ کال پرلپسې ورښتونو او سېلابونو ځپلي او په خبره یې اصلاح شوي تخمونه او کیمیاوي سرې دې ورته پر وخت وویشل شي.
یو تن بزګر وايي:« له موږ سره تر اوسه پورې د کرنې ریاست مرسته نه ده کړې. سږ کال ورښتونو او سېلابونو بزګران سخت ځپلي. موږ د کرنې ریاست او مرستندویه موسسو غواړو،چې پر وخت تخمونه راکړي.»
بزګران همدا راز وایي، وچکالۍ یې پر حاصلاتو اغیز کړی، د کیمیاوي سرې بیې لوړې دي او ډېری بزګران له درېیو کلونو راهیسې تخمونه بې سرې کري.
د پکتیا یو تن اوسېدونکی وايي:« تر اوسه پورې د تخمونو کرلو ته شااوخوا ۱۰ ورځې پاتې دي، که په دې وخت کې بزګرانو ته تخمونه ورکړل شي، نو ټول به ترې خوشاله شي. اصلاح شوي تخمونه ډېر ضرور دي او ضرورت هم ورته لرو. سره هم نه لرو، یوه بوجۍ سره شااوخوا ۱۲ زره کلدارې ده.»
د یاد ولایت کرنې او مالدارۍ ریاست مشر عبدالروف سعید هم مني،چې تخمونه ناوخته ویشل کیږي او وایي،مرستندویه بنسټونه لومړۍ سروې کوي او وروسته تخمونه ویشي او له همدې کبله ناوخته کیږي او ډېری سیمو کې تخمونه کرل شوي وي.
سږ کال د وچکالۍ او بیا پرلپسې ورښتونو له کبله د پکتیا بزګران تر بل هر وخت ډېر زیانمن شوي او د کرنې او مالدارۍ ریاست مالومات ښيي،چې سېلابونو دغه ولایت کې ۱۸ زره جریبه کرنیزې ځمکې تخریب کړي.
