په سوېل کې د پکتیا ولایت په زرمت ولسوالۍ کې د وروستیو ورښتونو او سېلابونو له کبله لسګونه کورونه ویجاړ او زرګونه جریبه کرنیزې ځمکې او د غنمو فصلونه زیانمن شوي دي.
د زرمت ولسوالۍ یو تن اوسېدونکی وايي:«ورښتونو او سېلابونو د خلکو کورونه یې وېجاړ کړل.دا خلک په راتلوونکې د دې توان نه لري،چې خپل کورونه ورغوي،ځکه اوس په افغانستان کې اقتصادي حالت تر بل هر وخت ډېر خراب دی. »
د زرمت ولسوالۍ یو بل اوسېدونکی بیا وايي:« د زیاتو سېلابونو راتګ له امله خلکو ته درانه مالي زیانونه اوښتي دي. »
د زرمت ولسوالۍ اوسېدونکي وایي، د غنمو فصلونه یې سیلابونو ډېر زیانمن کړي او له مرستندونه بنسټونو غواړي، بېړنۍ مرستې ورسره وکړي.
د زرمت ولسوالۍ یو تن ا وسېدونکی وايي:« له حکومته مو هېله دا ده،چې ژر تر ژره دا خوړ ازاد کړي، ترڅو د سېلابونو له امله بزګران زیانمن نه شي.»
د پکتیا اطلاعاتو او کولتور ریاست مشر خالقیار احمدزی بیا وايي، په زرمت ولسوالۍ کې د یو شمېر ادارو له لوري سروې پیل شوې او له بشپړیدو وروسته به بېلابېلو برخو کې له زیانمنو کورنیو سره مرستې وشي.
هغه زیاته کړه:« د زرمت ولسوالۍ اړوند سیمو کې د وروستیو ورښتونو له امله په راوتلو سېلابونو کې ولسي وګړو ته درانه مالي زیانونه اوښتي دي. په دغه برخه د بېلابېلو ادارو او مرستندویه خیریه موسسو له خوا سروې پیل شوې ده.»
په زرمت ولسوالۍ کې له سرې میاشتې پرته چا له زیانمنو کورنیو سره تراوسه پورې مرسته نه ده کړې.
د وروستیو ورښتونو له کبله پکتیا کې سېلابونو شپږ کسان مړه او ۳۲ نور ژوبل کړي،سلکونه کورونه ویجاړ او زرګونه هکتاره کرنیزې ځمکې او باغونه یې تخریب کړي دي.
