په سوېل پکتیا ولایت کې میشت یو شمیر کوچیان وایي،څاروي یې د سړې هوا او لوږې له کبله د مرګ له ګواښ سره مخامخ دي.
دوی وايي، له څو کلونو راهیسې یې د پاکستان حکومت پښتونخوا ته نه پریږدي،د واورو له کبله یې د پکتیا غرونو کې د څارویو لپاره د خوراک څه نه موندل کیږي او په خبره یې ډېری څاروي د یخنۍ او لوږې له کبله مړه شوي هم دي.
پکتیا کې میشت یو کوچی وايي:« سږ کال مو دلته دویم کال دی، نور کله به خوست ته تلو خو هلته نه ځاییږو. مخکې به ژمي کې کوچیان پښتونخوا ته تلل،خو اوس مو هلته نه پریږدي. موږ څه وکړو؟»
پکتیا کې میشت یو بل کوچی بیا وايي:« دوه میاشتې ورته پاتې دي، ټولې وزې لنګیږي له لوږې یې ټول بچیان واچول. مالداري مو له تباهۍ سره مخامخ ده.»
کوچیان وایي، له څارویو پرته بل پوله پټۍ نه لري او پر وینا یې اوس یې مالداري هم د ورکیدو له ګواښ سره مخامخ ده .
دوی همدا راز وایي، سون توکي او خپله هم د خوړو لپاره څه نه لري،د سړې هوا له کبله یې خیمو کې ماشومان په ډول ډول ناروغیو اخته شوي دي .
پکتیا کې میشت کوچی شیرخان وايي:« مالونه مو له لوږې مړه شول. موږ خپله هم د خوړو لپاره څه نه لرو. خیمې د واورې له کبله راباندې را چپه شوې. زموږ خو دا مالداري پوله او پټی دی.»
کوچیان وایي، څو ځله یې د مرسته په موخه حکومتي دروازې ټکولي،خو غږ یې نه دی اوریدل شوی او اوس اړ دي،چې د ژوند د پایښت لپاره سوال وکړي.
پکتیا کې میشت کوچی عجب ګل وايي:« ټوله ورځ سوال کوو وروره ، نور څه وکړو مرسته کې مو څو ځله نومونه ولیکل،خو تر اوسه چا هیڅ نه دي راکړي.د خدای لپاره له لوږې سره مخامخ یو.»
کوچیان له کرنې مالدارۍ ریاست او مرستندویه بسټونو غواړي،چې د پاتې څارویو د ژوندي ساتلو لپاره دې ورسره د درملو او حیواني خوراکي توکو مرسته وکړي.
