د بلخ ولایت ښاروال مولوي قدرت الله طارق له شمشاد نيوز سره په ځانګړې مرکه کې وويل، په تېرو شااوخوا درې مياشتو کې مزارشریف ښاروالۍ څه باندې ۴۰ مليونه عوايد تر لاسه کړي دي.
طارق وايي، د عوايدو دغه شمېر د پخواني حکومت د وروستيو شپږو مياشتو له عوايدو څو برابره زيات دی.
طارق زیاته کړه:« په تېرو درې مياشتو کې موږ تقريبا ۴۰ مليونه عوايد تر لاسه کړي دي، ما چې کومه بررسي کړې، د تېر حکومت په وروستيو شپږو مياشتو کې دوه میليونه عوايد هم ښاروالۍ ته نه دي راغلي.»
ښاروال همدا راز وايي، د ښاروالۍ د عوايدو برخه کې يې د هغه فساد مخه نيولي،چې په ترڅ کې به يې د پخواني حکومت پر مهال د ښاروالۍ عوايد حيف او ميل کېدل او شخصي جېبونو ته به تلل.
هغه زیاتوي:« ښاروالۍ ۷۲۸ غرفې چې پخوايي عوايد شخصي جيبونو ته تلل اوس د ښاروالۍ په لاس کې دي، له هرې غرفې به د پخواني حکومت پر مهال ۲۲۰۰ افغانۍ اخېستل کېدې او هغه هم شخصي جيبونو ته تللې او تر څنګ يې دغې غرفې سره له دې چې د ښاروالۍ مربوط وې د اشخاصو له خوا د پيسو په بدل کې لاس په لاس شوې وې، اوس مو مخه ورته نيولې او عوايد به يې ښاروالۍ ته راځي.»
په ورته وخت کې طارق وايي، د ښاريانو پر مشوره کار کوي،ترڅو د ښاروالۍ پوروړي خپل پورونه ورکړي.
طارق زیاته کړه:« د ښاروالۍ کوم قرضداران چې دي موږ هغوی ته وخت ورکوو،چې په بېلابېلو قسطونو کې خپل پورونه ښاروالۍ ته ورکړي. دوی سره مشوره کوو او د دوی په خوښه ورڅخه پور غواړو.»
اخوا مزارشريف کې يو شمېر غرفه لرونکي د ښاروالۍ له وروستيو هڅو ملاتړ کوي او زياتوي،چې د پخواني حکومت پر مهال له دوی څخه اخېستل کېدونکي عوايد شخصي جيبونو ته تلل،خو اوس خوشاله دي،چې ياد عوايد د ښاروالۍ له خوا ټولېږي.
مزارشريف کې غرفه لرونکی ضياالح وايي:« موږ اوس ډېر خوشاله يو، پخواني حکومت کې به چې له موږ ماليه اخېستل کېده،نو شخصي جيبونو ته تلله، اوس خوشاله يو،چې ماليه رانه اخلي،نو د دولت خزانې ته ځي. موږ يې هرکلی کوو.»
د مزارشريف ښاروال پر خلکو غږ کوي،چې خپل عوايد، ماليه او صفايي پر وخت ښاروالي ته وسپاري،ترڅو په دې ډول ملي عوايد په شفاف ډول راټول شي.
