یمن کې حوثي ډله وايي، د سعودي عربستان پر ښارونو يې ۱۴ ډرون بریدونه کړي، چې د ارماکو د تېلو پر مرکزونو ترسره شوي بریدونه هم په کې شامل دي.
حوثیان وايي، دغه بریدونه یې وروسته له هغې کړي، چې د سعودي په مشرۍ ایتلافي ځواکونو د یمن پر یو شمېر ښارونو ۱۳ هوايي بریدونه وکړل.
د حوثي ډلې یو نظامي ویاند وايي، دغه ۱۴ بریدونه یې د سعودي پر جدې، ریاض ، جیزان او نجران ښارونو باندې ترسره کړي دي.
اخوا سعودي د دغو تازه ډرون بریدونو په تړاو څه نه دي ويلي، خو ویل کېږي چې سعودي دفاعي سیسټم د دا ډول بریدونو مخنیوی په هوا کې کوي.
حوثیان او د سعودي په مشرۍ ایتلافي ځواکونه له ۲۰۱۵ کال راهیسې پر یو بل بریدونه کوي.
