د پاکستان حکومت ویاند فواد چودري وايي، حکومت او د طالبانو تحریک تازه پر یوه میاشتني اوربند هوکړه وکړه.
اخوا د پاکستان لومړي وزیر عمران خان هم د دغه خبر تایید کړی او د اوربند پر هوکړه یې ټینګار کړی دی.
فواد چودري دغه خبر د یوې اعلامیې په ترڅ کې ورکړی او زیاته کړې یې ده، چې د دواړو ترمنځ بشپړ اوربند اعلان شوی، چې ښايي نور هم وغځېږي.
د پاکستان دولتي تلویزیون ویلي، د دغې هوکړې مهمې برخې ځمکنۍ بشپړتیا ته درناوی، ملي امنیت، سوله، ټولنیز او اقتصادي ثبات دي.
دغه اوربند، چې نن د روانې نومبر میاشتې پر ۹مه نېټه پیل شوی د ډسمبر میاشتې تر ۹مې نیټې پورې به دوام وکړي.
