یمني چارواکي وايي، چاودنه په عدن ښار کې یوې پوستې ته نږدې شوې، چې له امله یې اته تنه وژل شوي او یوولس نور ټپیان دي.
ویل کېږي، چې دغه امنیتي پوسته د عدن ښار هوايي ډګر ته نږدې پرته وه.
د ښار اوسېدونکي وايي، چاودنه ډېره زوروره وه او شاوخوا ټولې ودانۍ یې زیانمنې کړي دي.
تر اوسه څرګنده نه ده، چې د برید موخه دغه پوسته وه، که هوايي ډګر ته یې ننوتل غوښتل.
تر دې وړاندې هم عدن ښار کې ډېرې چاودنې او بریدونه شوي، چې تل په کې القاعده او داعش ډله ملامت شوي دي.
خو تر اوسه څرګنده نه ده، چې د دې وروستي برید تر شا د کومې ډلې لاس دی.
بل لور ته د یمن حوثیانو هم څو ځل پر عدن ښار هوايي او ډرون بریدونه کړي دي.
یمن کې روانه جګړه له ۲۰۱۵ کال راهیسې پیل شوې، چې ګڼ شمېر کسان یې تېښتې ته اړ کړي او زرګونه نور په کې وژل شوي او ژوبل شوي دي.
