Skip to content
د افغانستان اسلامي امارت د مخکیني طرزالعمل له مخې،د پکتیا څمکنیو محکمه له دغې ولسوالۍ سربېره، د جاني خیلو ، پټان او سیدکرم ولسوالیو خلکو قضیو ته هم رسېدنه کوي.
د څمکنیو ولسوالۍ د حقوقو مدیر امین الله کمال وايي،د خلکو د قضیو په اړه حقوقو مدیریت، مصلحین او محکمه پریکړه کوي او هره ورځ تر لسو پورې قضیو ته رسېدنه کوي.
کمال زیاته کړه:« کومې قضیې چې دلته حقوقو کې او د مصلحینو له لوري حل نه شي، هغه بیا محکمې ته لېږل کیږي،څکمنیو ولسوالۍ کې د څلورو ولسوالیو، څمکنیو،پټان، جاني خیلو او سیدکرم ولسوالیو قاضي ناست دی. موږ هڅه کوو،چې ډېری قضیې دلته حقوقو مدیریت کې حل کړو،ځکه په قاضي کار ډېر دی.»
څلور میاشتې وړاندې څمکنیو ولسوالۍ کې د اسلامي امارت له لوري عدلیي او قضایي اداره فعاله شوې او په ټولییز ډول یې تر اوسه پورې له زرو ډېرې قضیې وروستۍ کړي دي .
د څمکنیو ولسوال عزت الله مخلص وايي:«که تاسو د هغې احصایې سره سم حساب وکړي، چې هره ورځ نږدې موږ لس فیصلې کوو، څه د قضا له لارې، څه د مصلحینو له لارې،نو تیرو څلورو میاشتو کې مو ګڼ شمیر پریکړې کړي دي .»
خلک بیا هره ولسوالۍ کې د عدلیي او قضایي ارګانونو د پرانېستلو غوښتنه کوي،ترڅو پر وخت د خلکو قضیو ته رسېدنه وشي.
د څمکنیو ولسوالۍ اوسېدونکی نقیب الله وايي:« د څلورو ولسوالیو پر سر یو قاضي دی. موږ له اسلامي امارته غواړو،چې هره ولسوالۍ کې محکمې فعالې کړي،ترڅو د خلکو ستونزو ته پر وخت رسېدنه وشي.»
ځایي مسوولین وایي، ټولو ولسوالیو کې د عدلیي او قضایي ادارو د فعالیدو په اړه د اسلامي امارت طرزالعمل د وروستي کیدو په حال کې دی.
