په روسیه کې د افغانستان په اړه جوړ شوی کنفرانس د یوې ګډې خبرپاڼې په خپرېدو پای ته ورسېده.
په ګډه خبرپاڼه کې برخوالو غوښتنه کړې، چې د افغانستان په اړه باید د ملګرو ملتونو پر ملاتړ د مالي مرستو یو کنفرانس راوبلل شي.
د خبرپاڼې یوه برخه:« د کنفرانس ګډونوالو وړاندیز کړی دی، چې باید د ملګرو ملتونو پر ملاتړ د مالي مرستو یو کنفرانس راوبلل شي او له شک پرته له ملګروملتونو سره په تفاهم باید له بحرانو وروسته د افغانستان اقتصادي او مالي بیارغاونې مهمه ونډه د هغو قوتونو پرغاړه وي، چې تېرو شلو کلونو کې یې افغانستان کې پوځي حضور درلود.»
د اسلامي امارت پلاوي د یاد کنفرانس په څنډه کې د کنفرانس ګډونوالو سره جلا ناستې هم درلودې او په بېلابېلو برخو کې له افغانستان سره د مرستو ژمنې شوې دي.
هند یو له هغو هېوادونو وو، چې مسکو ناسته کې یې له طالبانو سره د ډېرو مرستو ژمنه وکړه.
د هند استازي ویلي:« د افغانستان خلکو سره بشري مرستې په کار دي، افغانستان له سخت وضعيت څخه تېرېږي. هند چمتو دی، چې افغانستان ته بشري مرستې ورکړي.»
روسیه چې د مسکو د ناستې کوربه هېواد و، له اسلامي امارت سره یې د دوو هېوادونو په اړیکو او د سیمې په ثبات خبرې او بحثونه کړي دي.
روسیې بیا پر افغانستان د اسلامي امارت بشپړه واکمني یو واقعیت بللی او پر نړیوالو مرستو یې ټینګار وکړ.
چین هم په دې کنفرانس کې طالبانو ته ډاډ ورکړی، چې اړیکې به ورسره ساتي. چین له هېوادونو غوښتي، چې افغانستان پرې ښوول شي،. ترڅو افغانان وکولای شي خپل هېواد په خپله ورغوي.
د چین استازي ویلي:« له ګډونوالو غواړو، چې افغانستان سره مرسته وکړي، تر څو د افغانستان خلک خپل هېواد بيا ورغوي. موږ کولای شو، خپله سيمه لا امن، لا همکاره او باثباته کړو. موږ د طالبانو پر مشرۍ حکومت سره کار کوو. موږ د افغانستان په کورنيو چارو کې مداخله نه کوو.»
ایران او ترکمنستان هم طالبانو سره په جلا جلا لېدنو کې د دوو هېوادونو ترمنځ پر اړیکو او یو شمېر سیاسي مسایلو خبرې کړي دي
ترکمنستان ویلي، افغانستان کې د حکومت او نظام جوړونه افغانانو پورې اړه لري، چې څه ډول یې جوړوي.
ایران بیا په سیمه ییزو اقتصادي مسایلو خبرې کړي دي.
له دې سره په یومهال د چین، پاکستان، روسیې او اسلامي اماررت ترمنځ څلور اړخیزه ناسته کې بیا ټینګار شوی، چې د افغانستان نوي اسلامي حکومت سره به خپلو تعاملاتو ته ادامه ورکوي.
څلور اړخیزه ناسته:«درېیواړو لوریو ژمنه وکړه، چې د افغانستان نوي اسلامي حکومت سره به خپلو تعاملاتو ته ادامه ورکوي او په ګډه سره به هڅه وکړي، چې د افغانستان د خلکو بانکي ریزرف له کنګل خلاص شي.»
په دې کنفرانس کې د سیمې نږدې لسو هېوادونو استازو ګډون کړی و او له افغانستان سره یې د بشري مرستو پر دوام ټینګار وکړ.
ټاکل شوې، د مسکو له کنفرانس وروسته د روانې میاشتې پر ۲۷ مه نېټه د ایران په کوربتوب د بهرنیو چارو وزیرانو پر کچه کنفرانس ترسره شي.
