کورنیو چارو وزارت: د هېواد شمال کې د داعش جنګیالیو شتون په اړه د روسیې اندېښې بې ځایه دي

د افغانستان کورنیو چارو وزارت قاري سعید خوسيتي د شبنې پر ورځ د «۱۴۰۰ کال د تلې پر ۲۴ مه » د روسیې هېواد هغه ادعاوې رد کړې،چې ګواکې د هېواد په شمال کې د داعش ډلې ۲ زره جنګیالي شتون لري او د منځني ختیځ لپاره ستر ګواښ دی.

خوستی وايي، په افغانستان کې هېڅ ترهګره ډله فعالیت نه لري او د داعش ډلې په تړاوو دې هم څوک اندیښنه نه کوي،ځکه ددغې ډلې وړې هستې هم د لمنځه تلو په حال کې دي .

خوستی زیاتوي:« الحمد الله په  افغانستان کې امنیت ټینګ دی، کومه اندېښنه، چې دوی څرګندوي، دا بې ځایه ده.»

خوستی وایې، په وروستیو کې د عبادت ځایونو د ساتنې لپاره میکانیزم جوړ کړی،تر څو د خونړیو بریدونو مخه ونیول شي.

هغه زیاته کړه:« څنګه کولای شو، په راتلوونکې کې له دې برېدونو خپل هېوادوال وژغورو. په دې برخه کې کار شوی دی. موږ لاهم کار کوو،چې په راتلوونکې د دا ډول برېدونو شاهدان ونه واوسو.»

 د چارو یو شمیر څارونکي بیا وایي، نړیوال قدرتونه  د اقتصادي جګړې په درشل کې دي،چې هڅه کوي، افغانستان یو ځل بیا د جګړو په ډګر بدل کړي او خپلې ګټې خوندي کړي.

د چارو څارونکی جاوید مومند وايي:« زه فکر کوم،دلته اوس  د امریکا، روسیې او چین رقابتونه دي. دغه رقابتونه د دې لامل کېږي،چې بلاخره ځنې ډلې رامنځته شي. خو زه دا وایم،چې په افغانستان کې باید د دغو جګړو یا پروژو مخه  ونیول شي، که ونه نیول شي، خدای مه کړه،چې بیا  بله پروژه پر افغانستان ونه تپل شي.»

کورنیو چارو وزارت داسې مهال په شمال کې د داعش جنګیالیو د شتون په اړه د روسیې اندیښنې ځوابوي،چې داعش په ترو دوه اونیو کې په شمال او جنوب لویدیځ کې خونړي بریدونه کړي، چې لسګونه کسان یې یې وژلي او له سلو ډېر یې ټپیان کړي دي.