Skip to content
جي شل یا د نړۍ شل بډایه هېوادونه نن د افغانستان په تړاو یوه غونډه ترسره کوي.
دا غونډه ځانګړې ده او تمه ده، چې د افغانستان کې د روان ناورین لپاره ګټوره تمامه شي.
د ايټالیا لومړی وزیر ماریو دراګي، چې اوس مهال د جي شل هېوادونو مشري پر غاړه لري ویلي دي، غړي هېوادونه باید افغانستان کې د ناورین د مخنیوي لپاره خپل ګډ هدفونه وړاندې کړي.
ماریو دراګي ویلي، افغانستان کې د روان انساني بحران د مخنیوي لپاره تر ټولو زیات مسوولیت د بډایه هېوادونو دی، څو له قید او شرط پرته مرستې وکړي.
جي ۲۰ هېوادونو کې د امریکا متحده ایالاتو، بریتانیا، اروپایی ټولنې، چین، فرانسې، جرمني، ایټالیا، هند، کاناډا، ارجنټاین، اسټرالیا، برازیل، سویلي کوریا، جاپان، سعودي عربستان، مکسیکو ، سویلي افریقا، ترکیې او اندونیزیا شامل دي..
د ایټالیا صدراعظم ویلي، د غونډې په درشل کې یې د روسیې ولسمشر ولادیمیر پوتین او د چین ولسمشر شي جین پینګ په ګډون د بېلابېلو هېوادونو مشرانو سره د افغانستان په اړه خبرې کړي دي.
ماریو دراګي زیاته کړې، چې نړیواله ټولنه باید یوه ګډه ستراتیژي پلې کړي، څو د افغانستان د کړکېچ د حل سربېره دا هېواد د ترهګرو په خوندي پټنځای بدل نه شي.
تمه کېږي، چې د نړۍ د شلو بډایه هېوادونو پر مشرانو سربېره، د قطر استازی، د پیسو نړیوال وجهي صندوق، نړیوال بانک او ملګري ملتونه په نننۍ سرمشریزه کې ګډون وکړي.
