د جلغوزیو یو تن ځنګل لرونکی وايي:« د نورو کلونو پرتله یې حاصلات،څو برابره زیات دي،غوټې یې ښې پخې او ډکې دي او خلکو ښه حاصل تر لاسه کړی دی.»
د جلغوزیو یو بل ځنګل لرونکی بیا وايي:«حاصل یې له نورو کلونو څخه یو په لسه زیات دی،خو توپیر یې دا دی،چې نورو کلونو کې به چین او ځینو نورو هېوادونو ته صادریدل،خو سږ کال بازار نه لري.»
وروستیو کلونو کې د هوایي دهلیزونو له لارې جلغوزي چین او نورو هیوادونو ته صادر کېدل، د جلغوزیو کاروباریان له اسلامي امارته غواړي،چې د نړیوال بازار په موندلو کې دې ورسره مرسته وکړي.
د جلغوزیو یو تن سوداګر وايي:« موږ له اسلامي امارته غواړو،چې جلغوزیو ته وړ نړیوال بازار پیدا کړي،سږ کال یې بیې کمې دي. که نړیوال بازار ورته پیدا نه شي،موږ ته ګټه نه کوي.»
د پکتیا کرنې ریاست چارسمبالی علاوالدین شهید زوی وایي، اسلامي امارت په ټولییز ډول جلغوزیو ته د نړیوال بازار د موندلو په هڅه کې دی او سوداګر او کاروباریان دې په اړه اندیښنه نه کوي.
شهید زوی زیاتوي:« ان شاء الله اسلامي امارت او سوداګرۍ وزارت په دې لټه کې دی، چې جلغوزیو ته مناسب نړیوال بازار پیدا کړي. د جلغوزیو کاروباریان دې په دې اړه اندیښنه نه کوي.»
اندیښنې دا دي،که اسلامي امارت جلغوزیو ته نړیوال بازار ونه مومي،پاکستان ته به په قاچاقي ډول یووړل شي او هغه هېواد به یې پر خپل نوم صادر کړي.
