د کورنیو چارو وزارت وایي، اسلامي امارت د افغانستان ځمکني او هوايي حریم ساتونکی دی او د یوه خپلواک هېواد په توګه حق لري،چې له خپل حریم نه دفاع او ساتنه وکړي.
د یاد وزارت ویاند قاري سعید خوستی وايي، له امریکایانو سره د افغانستان د هوایي حریم د خوندي ساتلو په برخه کې تر یو حده توافق ته رسېدلي دي.
خوستی زیاتوي:« زموږ خبرې له امریکایي لوري روانې دي او تر یوه حده توافق ته هم سره رسېدلي یو. موږ خپل منځ کې د دوحې تړون لرو او په دې تړون کې ټول موارد واضح شوي دي له امریکایانو مو غوښتي،چې هوکړې ته ژمن پاتې شي، اسلامي امارت له چا سره منازعه او جنجال نه غواړي.»
امریکایانو له افغانستانه د وتلو پرمهال رادار او دفاعي سیستم هم تخریب کړی دی.
د سیاسي چارو تحلیل کوونکي بیا وايي، اوس د سیمې هېوادونو ته دا فرصت شته،چې د افغانستان له فضاء څخه د استخباراتي موخو لپاره کار واخلي.
د سیاسي چارو تحلیل کوونکی توریالی ځاځی وايي:« له تېرو څلوېښت کلونو راپه دې خوا د افغانستان هوایي حریم زموږ په واک کې نه وه،خو اوس چې بیا دفاعي سیستم تخریب شوی د سیمې هېوادونه او ګاونډیان به ترې د څارګرو کارونو لپاره کار واخلي.»
د افغانستان د هوایي حریم د کنترول لپاره تېر حکومت یو پیاوړی سیستم په څه د پاسه درې سوه میلیونه ډالره خبره کړې وه،چې له درې برخو یوه یې ورکړل شوې او نورې یې پاتې دي.
باور دا ده،چې اوس قطر او متحده امارات غواړي،د افغانستان د هوایي حریم په برخه کې پانګونه وکړي.
