روسیې د افغانستان او تاجکستان پر پوله وروستي کړکېچ په تړاو اندېښنه ښودلې

د روسيې د بهرنيو چارو وزارت ویلي، مسکو د افغانستان او تاجکستان پر پوله وروستی وضعیت له نږدې څاري او تمه یې ښودلې، چې راپورته شوې ترینګلتیاوې د خبرو له لارې حل شي.

د روسيې د بهرنيو چارو وزارت ویلي، وروستيو کې افغانستان او تاجکستان پولې ته پوځيان استولي، خو دوی له کابل او دوشنبې غواړي، چې د خبرو له لارې دې دا ستونزه حل کړي.

په دې وروستیو کې اسلامي امارت تور پورې کړی، چې تاجکستان د افغانستان په کورنیو چارو کې لاسوهنه کوي، خو تاجکستان بیا اسلامي امارت د واک پر انحصار تورن کوي او وايي، چې طالبانو حکومتي جوړښت کې ټولو افغانانو ته ونډه نه ده ورکړې.